- హైదరాబాద్లో హిట్ అండ్ రన్ కేసు
- యువతి మృతికి కారణమైన జనసేన ఎంపీ కుమారుడు..
- BNS సెక్షన్ 106(1) కింద కేసు
- ఇనార్బిట్ మాల్ వద్ద రోడ్డు దాటుతుండగా ఢీకొట్టిన ఆస్టన్ మార్టిన్ కారు..
- సేల్స్గర్ల్ భారతి ముఖి (26) దుర్మరణం
హైదరాబాద్, ఏపీబీ న్యూస్: హైదరాబాద్ నగరం మాదాపూర్ ఇనార్బిట్ మాల్ సమీపంలో ఘోర రోడ్డు ప్రమాదం చోటుచేసుకుంది. జనసేన పార్టీకి చెందిన రాజ్యసభ సభ్యుడు లింగమనేని రమేష్ కుమారుడు లింగమనేని సంజుష్ అత్యంత నిర్లక్ష్యంగా కారు నడిపి ఓ యువతి మరణానికి కారణమయ్యాడు.
ఆగస్టు 16న జరిగిన ఈ ‘హిట్ అండ్ రన్’ ఘటనపై సమగ్ర విచారణ జరిపిన మాదాపూర్ పోలీసులు, ప్రమాదానికి కారణమైన కారు నడుపుతున్నది జనసేన ఎంపీ కుమారుడేనని ఆధారాలతో సహా నిర్ధారించారు.
హిట్ అండ్ రన్ కేస్ – ప్రధాన వివరాలు:
బాధితురాలి వివరాలు: మృతి చెందిన యువతిని భారతి ముఖి (26)గా గుర్తించారు. ఆమె స్థానిక లైఫ్స్టైల్ స్టోర్లో సేల్స్గర్ల్గా విధులు నిర్వహిస్తోంది.
రోడ్డు ప్రమాదం జరిగే తీరు: ఆగస్టు 16న ఇనార్బిట్ మాల్ ఎదురుగా భారతి ముఖి రోడ్డు దాటుతుండగా.. అతివేగంగా వచ్చిన లగ్జరీ కార్ ఆస్టన్ మార్టిన్ (TG-09-G-0666) ఆమెను బలంగా ఢీకొట్టింది. తీవ్ర గాయాల పాలైన ఆమె అక్కడిక్కడే ప్రాణాలు కోల్పోయింది.
పోలీసుల దర్యాప్తు & కేసు నమోదు: సీసీటీవీ ఫుటేజ్, కారు రిజిస్ట్రేషన్ వివరాల ఆధారంగా పోలీసులు కేసు విచారణను వేగవంతం చేశారు. ఘటనా సమయంలో కారును నడిపింది ఎంపీ కుమారుడు లింగమనేని సంజుష్ అని విచారణలో స్పష్టమైంది.
చట్టపరమైన చర్యలు:
సంజుష్పై భారతీయ న్యాయ సంహిత (BNS)లోని సెక్షన్ 106(1) (నిర్లక్ష్యం వల్ల మరణానికి కారణం కావడం) కింద మాదాపూర్ పోలీసులు కేసు నమోదు చేసి తదుపరి చట్టపరమైన చర్యలు వేగవంతం చేశారు.
ఈ ఘటన నగరంలో తీవ్ర సంచలనం సృష్టించగా, నిందితుడిపై కఠిన చర్యలు తీసుకోవాలని బాధిత కుటుంబ సభ్యులు, ప్రజా సంఘాలు డిమాండ్ చేస్తున్నాయి.
