- ₹25 లక్షల పరిహారం చెల్లించాలి!’: పిల్లి రామరాజు డిమాండ్
- అనుమతి లేని అనధికార ఫ్లెక్సీలను తక్షణమే తొలగించాలి..
- కాంగ్రెస్, బీఆర్ఎస్ పోటీపోటీ ఫ్లెక్సీ రాజకీయంపై బీజేపీ నాయకుడు పిల్లి రామరాజు ధ్వజం
నల్లగొండ ప్రతినిధి, ఏపీబీ న్యూస్: నల్లగొండ జిల్లా కేంద్రంలో అనధికార ఫ్లెక్సీలు కడుతూ ప్రమాదవశాత్తు విద్యుత్ షాక్తో మృతి చెందిన రాజు కుటుంబానికి భారతీయ జనతా పార్టీ (బీజేపీ) రాష్ట్ర నాయకులు, నల్లగొండ అసెంబ్లీ పోటీ చేసిన అభ్యర్థి పిల్లి రామరాజు తీవ్ర సంతాపం, ప్రగాఢ సానుభూతి తెలిపారు. నిరుపేద కుటుంబానికి చెందిన రాజు అకాల మరణం పట్ల ఆయన తీవ్ర ఆవేదన వ్యక్తం చేశారు.
సోమవారం ఆయన మీడియా సమావేశంలో మాట్లాడుతూ.. నల్లగొండ నగరంలో నిబంధనలకు విరుద్ధంగా, అనుమతి లేకుండా ఏర్పాటు చేసిన అనధికార ఫ్లెక్సీలను వెంటనే తొలగించాలని నల్లగొండ మున్సిపల్ కమిషనర్ వంశీకృష్ణను కోరారు.
మీడియా సమావేశంలో పిల్లి రామరాజు వెల్లడించిన ప్రధాన డిమాండ్లు:
₹25 లక్షల పరిహారం ఇవ్వాలి: యువకుడు రాజు మృతికి కారణమైన ఫ్లెక్సీల నిర్వాహకులు, బీఆర్ఎస్ మాజీ ఎమ్మెల్యే భూపాల్ రెడ్డి తక్షణమే స్పందించి బాధితుడి కుటుంబానికి రూ. 25 లక్షల పరిహారం చెల్లించాలని డిమాండ్ చేశారు.
బాధ్యులపై క్రిమినల్ కేసులు: రాజు మృతికి కారకులైన వారిపై, అలాగే నిర్లక్ష్యంగా వ్యవహరించిన నల్లగొండ కార్పొరేషన్ సిబ్బంది మరియు విద్యుత్ శాఖ అధికారులపై తక్షణమే కేసులు నమోదు చేసి కఠిన చర్యలు తీసుకోవాలన్నారు.
కాంగ్రెస్, బీఆర్ఎస్ల పోటీ రాజకీయాలు: నల్లగొండ పట్టణంలో కాంగ్రెస్, బీఆర్ఎస్ పార్టీల నాయకులు పోటీపడి అనధికారికంగా ఫ్లెక్సీలు ఏర్పాటు చేస్తూ సామాన్య ప్రజల, కార్మికుల ప్రాణాలతో చెలగాటమాడుతున్నారని విమర్శించారు.
ట్రాన్స్ఫార్మర్ల వద్ద భద్రతా చర్యలు: నల్లగొండ పట్టణంలో ప్రహరీ గోడలు (రక్షణ కంచెలు) లేక ప్రమాదకరంగా ఉన్న విద్యుత్ ట్రాన్స్ఫార్మర్ల వద్ద తక్షణమే రక్షణ చర్యలు చేపట్టాలని విద్యుత్ అధికారులను డిమాండ్ చేశారు.
నిబంధనల ఉల్లంఘనపై చర్యలు:
ప్రజల భద్రతకు ముప్పుగా మారుతున్న అనధికార కటౌట్లు, ఫ్లెక్సీలపై మున్సిపల్ యంత్రాంగం ఉక్కుపాదం మోపాలని, బాధ్యులపై భారీ జరిమానాలు విధించాలని స్పష్టం చేశారు.
మృతి చెందిన రాజు కుటుంబానికి ప్రభుత్వం మరియు స్థానిక నాయకులు అన్ని విధాలా అండగా నిలవాలని, ఆ కుటుంబాన్ని పూర్తిస్థాయిలో ఆదుకోవాలని పిల్లి రామరాజు డిమాండ్ చేశారు.
