- పోరాటం ఉద్ధృతం చేస్తామని భూక్యా వీరభద్రం హెచ్చరిక
- రూ.25 వేల రుణం కాస్తా వడ్డీలతో లక్ష దాటింది.. బ్యాంకు అధికారుల వేధింపులపై రైతుల ఆగ్రహం!
- డిప్యూటీ సీఎం భట్టి, మంత్రులు తుమ్మల, పొంగులేటి వెంటనే స్పందించాలని డిమాండ్!
- తిమ్మారావుపేట సెంటర్ నుండి భారీ ర్యాలీ.. సమస్య తేలకుంటే దశలవారీ ఉద్యమానికి సై!
ఏన్కూర్/ఖమ్మం, ఏపీబీ న్యూస్: తెలంగాణ ప్రభుత్వం ప్రతిష్టాత్మకంగా ప్రకటించిన రైతు రుణమాఫీ పథకం క్షేత్రస్థాయిలో గిరిజన పోడు రైతులకు అందకపోవడంపై ఉమ్మడి ఖమ్మం జిల్లాలో నిరసన జ్వాలలు ఎగిసిపడ్డాయి. ఖమ్మం జిల్లా ఏన్కూర్ మండలం తిమ్మారావుపేటలోని తెలంగాణ గ్రామీణ బ్యాంకు (TGB) ఎదుట సోమవారం భారీ సంఖ్యలో గిరిజన రైతులు బైఠాయించి నిరసన ప్రదర్శన చేపట్టారు.
రూ.25 వేల అప్పు.. లక్షకు పైగా వడ్డీ భారం:
మూలపోచారం, రాంనగర్ తండా, నెమలిపురి, రంగాపురం తదితర గ్రామాల నుండి తరలివచ్చిన గిరిజన రైతులు మొదట తిమ్మారావుపేట సెంటర్ నుండి బ్యాంక్ వరకు భారీ ప్రదర్శన, ర్యాలీ నిర్వహించారు.
పెరిగిపోయిన భారం: గతంలో తాము సాగు చేసుకుంటున్న పోడు భూమి హక్కు పత్రాల (పట్టాల) ఆధారంగా బ్యాంక్ నుండి తీసుకున్న రూ.25,000 రుణం.. ప్రస్తుతం వడ్డీలు, చక్రవడ్డీలతో కలిసి రూ. లక్షకు పైగా పెరిగిపోయిందని రైతులు ఆవేదన వ్యక్తం చేశారు.
అధికారుల ఒత్తిడి: ఒకవైపు ప్రభుత్వం ఇచ్చిన రుణమాఫీ వీరికి వర్తించకపోగా.. మరోవైపు బ్యాంక్ అధికారులు మాత్రం పాత అప్పు కట్టాలంటూ నోటీసులు ఇస్తూ తమపై తీవ్ర మానసిక ఒత్తిడి తెస్తున్నారని గిరిజనులు మండిపడ్డారు.
పాలకులు హామీలు మరిచారు – భూక్యా వీరభద్రం ఫైర్:
గిరిజన సంఘం జిల్లా ప్రధాన కార్యదర్శి, సీపీఎం (CPM) వైరా డివిజన్ కార్యదర్శి భూక్యా వీరభద్రం ఆధ్వర్యంలో ఈ ముట్టడి కార్యక్రమం జరిగింది. ఈ సందర్భంగా ఆయన మాట్లాడుతూ.. గిరిజన, పోడు రైతుల పట్ల కాంగ్రెస్ ప్రభుత్వం తీవ్ర నిర్లక్ష్యంగా వ్యవహరిస్తోందని విమర్శించారు. ఎన్నికల సమయంలో గిరిజనులకు ఇచ్చిన హామీలను పాలకులు పూర్తిగా విస్మరించారని దుయ్యబట్టారు.
ఉమ్మడి ఖమ్మం జిల్లాకు ప్రాతినిధ్యం వహిస్తున్న ఉప ముఖ్యమంత్రి భట్టి విక్రమార్క , మంత్రులు తుమ్మల నాగేశ్వరరావు, పొంగులేటి శ్రీనివాస్ రెడ్డి మరియు వైరా ఎమ్మెల్యే మాళోత్ రాందాస్ నాయక్ ఈ లూప్హోల్స్ పై తక్షణమే స్పందించి గిరిజన పోడు రైతులకు రుణమాఫీ వర్తింపజేయాలని డిమాండ్ చేశారు. సమస్య పరిష్కారం కాకుంటే రాబోయే రోజుల్లో దశలవారీగా పోరాటాలను ఉద్ధృతం చేస్తామని హెచ్చరించారు.
రీజనల్ మేనేజర్తో చర్చలు – వినతిపత్రం సమర్పణ:
ఆందోళన అనంతరం రైతుల బృందం బ్యాంక్ మేనేజర్ను కలిసి వినతిపత్రం అందజేసింది. దీనిపై సానుకూలంగా స్పందించిన మేనేజర్.. ఈ సమస్యను వెంటనే ఉన్నతాధికారుల దృష్టికి తీసుకెళ్లి న్యాయం జరిగేలా చూస్తానని హామీ ఇచ్చారు. ఇదే సమయంలో భూక్యా వీరభద్రం ఫోన్ ద్వారా బ్యాంక్ రీజనల్ మేనేజర్తో (RM) మాట్లాడి, గిరిజన రైతులకు తక్షణమే పాత అప్పులను మాఫీ చేసి, కొత్తగా ఎకరానికి లక్ష రూపాయల చొప్పున పంట రుణాలు అందించాలని కోరారు.
ఈ కార్యక్రమంలో గిరిజన సంఘం జిల్లా అధ్యక్షులు బానోత్ బాలాజీ, సీపీఎం మండల కార్యదర్శి దొంతబోయిన నాగేశ్వరరావు, ఏర్పుల రాములు, భూక్యా లక్ష్మ, ఇటికాల లెనిన్, రైతు సంఘం నాయకులు నండూరి శ్రీనివాసరావు, గుడ్ల వెంకటేశ్వర్లు, కొంగర సుధాకర్, మాడపాటి మల్లికార్జునరావు, వలపాల నరసింహారావుతో పాటు పోడు రైతులు బోడ రఘు, కోరం రాంమూర్తి, చీమల రాములమ్మ, ఇరప్ప భారతమ్మ, లాకావత్ రామీ, గూగుల్ హోలీ, రంగమ్మ, సమత, అచ్చమ్మ, గురవమ్మ తదితరులు పెద్ద సంఖ్యలో పాల్గొన్నారు.
