సీఎంవో సెక్యూరిటీపై దాడికి దిగిన బుర్రి శ్రీనివాస్ రెడ్డి.. అసలేం జరిగింది?
నల్లగొండ బ్యూరో, ఏపీబీ న్యూస్: నల్లగొండ జిల్లా కేంద్రంలో ఆదివారం అత్యంత ప్రతిష్ఠాత్మకంగా నిర్వహించిన ముఖ్యమంత్రి రేవంత్ రెడ్డి భారీ బహిరంగ సభ కాంగ్రెస్ అంతర్గత వర్గపోరుకు వేదికగా మారింది. సభ ముగిసే సమయానికి వేదికపైనే నేతల మధ్య తీవ్రస్థాయిలో ఘర్షణ చోటుచేసుకుంది. ఈ సంచలన ఉదంతం కాంగ్రెస్ శ్రేణులను తీవ్ర దిగ్భ్రాంతికి గురిచేసింది. నల్లగొండ మున్సిపల్ నాయకుడు బుర్రి శ్రీనివాస్ రెడ్డిని సీఎంవో (CMO) సెక్యూరిటీ సిబ్బంది వేదికపై నుంచి వెనక్కి నెట్టివేయడంతో ఈ గొడవ మొదలైనట్లు తెలుస్తోంది.
ముఖ్యమంత్రి రేవంత్ రెడ్డి సభ ముగించుకుని స్టేజ్ దిగగానే.. ఆగ్రహంతో ఊగిపోయిన బుర్రి శ్రీనివాస్ రెడ్డి, తనను అడ్డుకున్న సీఎంవో సెక్యూరిటీ సిబ్బందిపై దారుణంగా దాడికి దిగడం స్థానికంగా తీవ్ర కలకలం రేపింది. దీంతో స్పాట్లో ఉన్న పోలీసులు, తోటి నేతలు వెంటనే జోక్యం చేసుకుని పరిస్థితిని అదుపు చేయాల్సి వచ్చింది.
డీసీసీ అధ్యక్షుడు పున్నా కైలాష్ నేతకు అవమానం? కోమటిరెడ్డి వర్గం స్కెచ్
ఈ సభ చుట్టూ నల్లగొండ కాంగ్రెస్లో ఉన్న గ్రూపు రాజకీయం ఒక్కసారిగా బట్టబయలైంది. నల్లగొండ జిల్లా కాంగ్రెస్ కమిటీ (DCC) అధ్యక్షుడు పున్నా కైలాష్ నేతను ఈ ప్రతిష్ఠాత్మక మీటింగుకు పిలవకుండా దూరం పెట్టాలని, తద్వారా ఆయనను అవమానించాలని స్థానిక కోమటిరెడ్డి వర్గం గట్టిగా ప్రయత్నించినట్లు పార్టీ వర్గాల్లో తీవ్ర చర్చ నడుస్తోంది.
సీఎంవో వర్సెస్ స్థానిక నేతలు: ఒకవైపు సభలో డీసీసీ ప్రెసిడెంట్ పున్నా కైలాష్ నేత చేసిన సేవలను, ఆయన పనితీరును ముఖ్యమంత్రి రేవంత్ రెడ్డి స్వయంగా స్టేజీపై నుంచే ప్రశంసలతో ముంచెత్తారు.
సన్మానం అడ్డుకున్న సెక్యూరిటీ: అయితే, సీఎం రేవంత్ రెడ్డికి సన్మానం చేయనీయకుండా, ఆయనను నేరుగా కలవనీయకుండా కోమటిరెడ్డి వర్గానికి చెందిన ముఖ్యనేతలు గుమ్మల మోహన్ రెడ్డి, బుర్రి శ్రీనివాస్ రెడ్డిలను సీఎంవో సెక్యూరిటీ సిబ్బంది గట్టిగా లైన్ దాటకుండా అడ్డుకున్నారు.
ప్రోటోకాల్ రచ్చ.. రేవంత్ రెడ్డి దిగగానే సెక్యూరిటీపై దాడి
ముఖ్యమంత్రి పర్యటనల్లో భద్రతా నిబంధనల ప్రకారం సీఎంవో సెక్యూరిటీ ఇంచార్జ్ ఇచ్చిన క్లియరెన్స్ ఉన్నవారినే విఐపి లైన్లోకి అనుమతిస్తారు. అయితే స్థానిక మున్సిపల్ నేత బుర్రి శ్రీనివాస్ రెడ్డి సీఎంను కలవడానికి ముందుకు దూసుకురాగా, భద్రతా సిబ్బంది ప్రోటోకాల్ రీత్యా ఆయనను వెనక్కి నెట్టేశారు.
పొలిటికల్ సర్కిల్స్లో హాట్ టాపిక్: ఈ తోపులాటతో తీవ్ర అవమానంగా భావించిన బుర్రి శ్రీనివాస్ రెడ్డి, సీఎం రేవంత్ రెడ్డి వేదిక దిగి కాన్వాయ్ వైపు వెళ్లగానే.. నేరుగా సీఎంవో సెక్యూరిటీ ఆఫీసర్ల మీదికే దాడికి వెళ్లడం నల్లగొండ కాంగ్రెస్లో కొత్త గుబులు రేపుతోంది. సీఎం భద్రతా సిబ్బందిపైనే ఒక అధికార పార్టీ నేత దాడికి దిగడంపై ఇంటెలిజెన్స్ వర్గాలు కూడా నివేదిక సిద్ధం చేస్తున్నట్లు సమాచారం.
గ్రూపు రాజకీయాలతో గాడితప్పుతున్న కాంగ్రెస్ ప్రతిష్ఠ
మంత్రి కోమటిరెడ్డి వెంకట్ రెడ్డి ఆధిపత్యం నడుస్తున్న ఉమ్మడి నల్లగొండ జిల్లాలో, సీఎం రేవంత్ రెడ్డికి అత్యంత సన్నిహితుడిగా ఉన్న డీసీసీ చీఫ్ పున్నా కైలాష్ నేతను టార్గెట్ చేయడం వల్లే ఈ రచ్చ అంతా జరిగిందని పొలిటికల్ అనలిస్టులు అభిప్రాయపడుతున్నారు. లక్ష మందితో సభను సక్సెస్ చేసి మైలేజ్ తెచ్చుకుందామనుకున్న తరుణంలో.. స్టేజీ మీదే సెక్యూరిటీతో ప్రజాప్రతినిధుల భర్తలు, స్థానిక లీడర్లు గొడవకు దిగడం కాంగ్రెస్ హైకమాండ్ దృష్టికి కూడా వెళ్లినట్లు తెలుస్తోంది.
