- బీహార్ ఎఫ్ఐఆర్లో నిందితుడిగా ఉన్నా ఆధారాలు లేవని ఛార్జ్షీట్లో పేరు మినహాయింపు..
- నీట్ పేపర్ లీక్ ముఠాకోరు సంజీవ్ ముఖియాకు సీబీఐ క్లీన్ చిట్
- కేంద్ర ప్రభుత్వ తీరుపై విద్యార్థుల మండిపాటు.
న్యూఢిల్లీ/పాట్నా, ఏపీబీ న్యూస్: దేశవ్యాప్తంగా పెను సంచలనం సృష్టించిన నీట్ (NEET) ప్రశ్నాపత్రం లీకేజీ కేసులో కేంద్ర దర్యాప్తు సంస్థ (CBI) కీలక ప్రకటన చేసింది. కేసులో ప్రధాన సూత్రధారిగా భావించిన సంజీవ్ కుమార్ అలియాస్ సంజీవ్ ముఖియాకు ఈ కుట్రతో ఎలాంటి సంబంధం ఉన్నట్లు ఆధారాలు లభించలేదని చెబుతూ సీబీఐ అతనికి క్లీన్ చిట్ ఇచ్చింది. లీకేజీ కుట్రను పూర్తిగా ఛేదించామని ప్రకటిస్తూనే, ప్రధాన నిందితుడిగా ఉన్న వ్యక్తికి విముక్తి కల్పించడంపై విద్యార్థి లోకం తీవ్ర ఆగ్రహం వ్యక్తం చేస్తోంది.
బీహార్ ఎఫ్ఐఆర్ నుంచి సీబీఐ క్లీన్ చిట్ వరకు
నీట్ పేపర్ దొంగతనం బయటపడిన సమయంలో బీహార్ పోలీసులు నమోదు చేసిన ప్రారంభ ఎఫ్ఐఆర్లో సంజీవ్ ముఖియా పేరును చేర్చారు. ఇతర పోటీ పరీక్షల పేపర్ లీకేజీల్లో అతని ప్రమేయం ఉండటంతో ప్రాథమిక అనుమానంతో పోలీసులు నిందితుడిగా పేర్కొన్నారు. ఆ తర్వాత విచారణ బాధ్యతలు స్వీకరించిన సీబీఐ, పాట్నా ప్రత్యేక కోర్టులో ఇప్పటివరకు 45 మంది నిందితులపై బహుళ ఛార్జ్షీట్లను దాఖలు చేసింది. ప్రశ్నాపత్రం దొంగిలించిన వారు, పంపిణీ చేసిన ముఠా మరియు దీని ద్వారా లబ్ధి పొందిన అభ్యర్థులందరినీ గురితించామని స్పష్టం చేసిన సీబీఐ, సంజీవ్ ముఖియాకు వ్యతిరేకంగా మాత్రం ఎలాంటి ఆధారాలు లభించలేదని క్లీన్ చిట్ ఇస్తూ ఛార్జ్షీట్లో అతని పేరును చేర్చలేదు.
కేసులోని ప్రధానాంశాలు:
- సిబిఐ క్లీన్ చిట్: సంజీవ్ ముఖియాకు నీట్ 2024 ప్రశ్నాపత్రం లీకేజీతో సంబంధం ఉన్నట్లు ఆధారాలు లేవని సీబీఐ స్పష్టీకరణ.
- దాఖలైన ఛార్జ్షీట్లు: పాట్నా కోర్టులో 45 మంది నిందితులపై అధికారికంగా అభియోగపత్రాలు దాఖలు.
- జైలులోనే ముఖియా: సీబీఐ కేసులో బెయిల్ లభించినప్పటికీ, బీహార్ పోలీసులు నమోదు చేసిన ఇతర పేపర్ లీకేజ్ కేసులలో సంజీవ్ ముఖియా ఇంకా రిమాండ్లోనే ఉన్నారు.
- విద్యార్థుల ఆగ్రహం: ప్రధాన నిందితులకు విముక్తి కల్పించడంపై మండిపడుతున్న విద్యార్థి సంఘాలు.
కేంద్రం తీరుపై విద్యార్థులు, విపక్షాల నిలదీత
ఒకవైపు పేపర్ లీకేజీలపై కఠిన చర్యలు తీసుకుంటామని, ఎవరినీ విడిచిపెట్టబోమని ప్రధాని మోదీ హామీ ఇస్తుండగా, మరోవైపు సీబీఐ ప్రధాన నిందితులకు క్లీన్ చిట్ ఇవ్వడం ఏంటని విద్యార్థి సంఘాలు విమర్శిస్తున్నాయి. బిజెపి నేతృత్వంలోని కేంద్ర ప్రభుత్వం వ్యవస్థలను ఉపయోగించుకుని అసలు సూత్రధారులను కాపాడుతోందని, ఇటువంటి చర్యల వల్ల ప్రభుత్వంపై నమ్మకం సడలుతోందని ఆందోళనకారులు నిలదీస్తున్నారు. మరోవైపు సీబీఐ క్లీన్ చిట్ ఇచ్చినప్పటికీ, ఇతర పరీక్షల లీకేజీ కేసుల్లో బీహార్ పోలీసులు అరెస్టు చేయడంతో సంజీవ్ ముఖియా ప్రస్తుతం జ్యుడీషియల్ కస్టడీలోనే కొనసాగుతున్నారు.
