- వీధి వ్యాపారుల జీవనోపాధి, డిజిటల్ సాధికారతపై పార్లమెంట్లో సుదీర్ఘ సమీక్ష!
- సర్టిఫికెట్ల జారీ, లోన్ల మంజూరులో జాప్యంపై అధికారులను ప్రశ్నించిన ఎంపీ చామల!
- అర్హులైన ప్రతి ఒక్కరికీ సకాలంలో సాయం అందేలా నియమాలను సరళీకరించాలని డిమాండ్!
న్యూఢిల్లీ, ఏపీబీ న్యూస్: భువనగిరి లోక్సభ సభ్యులు చామల కిరణ్ కుమార్ రెడ్డి న్యూఢిల్లీలో జరిగిన పార్లమెంటరీ స్టాండింగ్ కమిటీ ఆన్ హౌసింగ్ అండ్ అర్బన్ అఫైర్స్ (Parliamentary Standing Committee on Housing and Urban Affairs) కీలక సమావేశంలో పాల్గొన్నారు. ఈ ఉన్నత స్థాయి సమావేశంలో కేంద్ర ప్రభుత్వం ప్రతిష్టాత్మకంగా అమలు చేస్తున్న పీఎం స్వనిధి (PM SVANidhi) పథకం అమలు తీరు, ఇప్పటివరకు సాధించిన పురోగతిపై కమిటీ సభ్యులు సుదీర్ఘంగా సమీక్షించారు.
వీధి వ్యాపారుల ఆర్థిక బలోపేతమే లక్ష్యం:
ఈ సమావేశంలో ప్రధానంగా వీధి వ్యాపారుల జీవనోపాధి మెరుగుదల, వారి ఆర్థిక సమ్మిళితం (Financial Inclusion), డిజిటల్ సాధికారత మరియు క్షేత్రస్థాయిలో ఆర్థిక కార్యకలాపాల ప్రోత్సాహం వంటి కీలక అంశాలపై కమిటీ విస్తృతంగా చర్చించింది.
క్షేత్రస్థాయి సమస్యలను లేవనెత్తిన భువనగిరి ఎంపీ:
ఈ సందర్భంగా భువనగిరి ఎంపీ చామల కిరణ్ కుమార్ రెడ్డి మాట్లాడుతూ.. నిరుపేద వీధి వ్యాపారులు నిత్యం ఎదుర్కొంటున్న క్షేత్రస్థాయి సమస్యలను పార్లమెంటరీ కమిటీ వేదికగా ప్రస్తావించారు.
డాక్యుమెంటేషన్ ఇబ్బందులు: లబ్ధిదారులకు ధ్రువీకరణ పత్రాల (Certificates) జారీలో జరుగుతున్న ఆలస్యాన్ని, డాక్యుమెంటేషన్ ప్రక్రియలో ఉన్న కఠిన నిబంధనలను ఆయన అధికారుల దృష్టికి తీసుకెళ్లారు.
అర్హుల గుర్తింపు – క్రెడిట్ జాప్యం: అర్హులైన వీధి వ్యాపారులను గుర్తించడంలో ఉన్న లోపాలను ఎండగట్టడంతో పాటు, వారికి సకాలంలో లభించాల్సిన ముద్ర లోన్లు, క్రెడిట్ సదుపాయాల మంజూరులో జరుగుతున్న తీవ్ర జాప్యంపై అధికారులను ప్రశ్నించారు.
నియమాల సరళీకరణ: కేంద్ర ప్రభుత్వ పథకాల ప్రయోజనాలు మధ్యవర్తులు లేకుండా, ప్రతి అర్హులైన వీధి వ్యాపారికి నేరుగా, సకాలంలో అందేలా ప్రస్తుతమున్న కఠిన విధానాలను వీలైనంత సరళీకృతం (Simplify) చేయాలని ఎంపీ చామల కిరణ్ కుమార్ రెడ్డి గట్టిగా సూచించారు.
