- దాడికి ప్రతిదాడి తప్పదు..
- నల్లగొండ శాంతిభద్రతలకు విఘాతం కలిగిస్తే ఊరుకునేది లేదు..
- మాజీ మున్సిపల్ చైర్మన్ బుర్రి శ్రీనివాస్ రెడ్డి, గుమ్ముల మోహన్ రెడ్డి తీవ్ర హెచ్చరికలు
నల్లగొండ ప్రతినిధి, ఏపీబీ న్యూస్: రోడ్లు, భవనాల శాఖ మంత్రి కోమటిరెడ్డి వెంకటరెడ్డి నివాసంపై దాడికి తెగబడిన బీజేపీ శ్రేణుల తీరుపై కాంగ్రెస్ నాయకులు తీవ్ర ఆగ్రహం వ్యక్తం చేశారు. నల్లగొండలోని మంత్రి క్యాంప్ కార్యాలయంలో నిర్వహించిన విలేకరుల సమావేశంలో ఎమ్మెల్సీ శంకర్ నాయక్, మాజీ మున్సిపల్ చైర్మన్ బుర్రి శ్రీనివాస్ రెడ్డి, మాజీ జెడ్పీటీసీ గుమ్ముల మోహన్ రెడ్డి పాల్గొని బీజేపీ, బీఆర్ఎస్ పార్టీల తీరుపై ఘాటుగా స్పందించారు.
ప్రజాస్వామ్యబద్ధంగా నిరసనలు తెలిపే హక్కు ప్రతి ఒక్కరికీ ఉంటుందని, అయితే సంస్కారహీనంగా ప్రవర్తిస్తూ భౌతిక దాడులకు దిగితే పరిణామాలు తీవ్రంగా ఉంటాయని హెచ్చరించారు.
“చిల్లర రాజకీయాల కోసమే దాడులు” – ఎమ్మెల్సీ శంకర్ నాయక్
ఎమ్మెల్సీ శంకర్ నాయక్ మాట్లాడుతూ బీజేపీ జిల్లా అధ్యక్షుడి తీరుపై మండిపడ్డారు:
విలువలు లేని నాయకత్వం: “బీజేపీలో ఎంతోమంది విలువలు కలిగిన నేతలు ఉన్నారు. కానీ నల్లగొండ బీజేపీ జిల్లా అధ్యక్షుడు ఒక చిల్లర నాయకుడు. ఇలాంటి వారి వల్ల ఆ పార్టీకి ఎలాంటి ప్రయోజనం లేదు.”
సహించేది లేదు: “నల్లగొండలో మంత్రి కోమటిరెడ్డి వెంకటరెడ్డి నివాసానికే వచ్చి దాడి చేస్తే మేము చూస్తూ ఊరుకుంటామా? తగిన బుద్ధి చెప్తాం. ఇక్కడ బీజేపీ, బీఆర్ఎస్ రెండూ ఒకటై సంస్కారహీనంగా ప్రవర్తిస్తున్నాయి.”
సోషల్ మీడియా ప్రాచుర్యం కోసమే: సొంత తమ్ముడిని కార్పొరేటర్గా కూడా గెలిపించుకోలేని వ్యక్తులు సోషల్ మీడియాలో ఫేమస్ కావడం కోసమే పిచ్చిలేసినట్లు ప్రవర్తిస్తున్నారని విమర్శించారు. మరోసారి ఇలాంటి ఘటనలు పునరావృతమైతే పరిణామాలు తీవ్రంగా ఉంటాయని స్పష్టం చేశారు.
“దాడికి ప్రతిదాడి ఎప్పుడైనా ఉంటుంది” – బుర్రి శ్రీనివాస్ రెడ్డి సవాల్
నల్లగొండ మాజీ మున్సిపల్ చైర్మన్ బుర్రి శ్రీనివాస్ రెడ్డి మాట్లాడుతూ బీజేపీ జిల్లా అధ్యక్షుడు వర్షిత్ రెడ్డిపై సంచలన వ్యాఖ్యలు చేశారు.
కార్యాలయంలో దాక్కున్నారు: “మంత్రి ఇంటిపై దాడి చేసి బీజేపీ జిల్లా అధ్యక్షుడు వర్షిత్ రెడ్డి ఆఫీసులో దాక్కుంటున్నాడు. దమ్ముంటే బయటకు రావాలి” అని సవాల్ విసిరారు.
అబద్ధపు ప్రచారాలు: తన తల్లిపై దాడి చేసినట్లు వర్షిత్ రెడ్డి అబద్ధపు ప్రచారం చేస్తున్నాడని మండిపడ్డారు. పేపర్లు, సోషల్ మీడియాలో రావడానికి చిల్లర పనులు చేస్తున్నారని, అతనికి తగిన బుద్ధి చెప్పే వరకు వదిలిపెట్టేది లేదన్నారు. బీఆర్ఎస్ మాజీ ఎమ్మెల్యే కూడా విలువలు మరిచి ప్రవర్తిస్తున్నారని, తమను రెచ్చగొడితే ఊరుకునే ప్రసక్తే లేదని స్పష్టం చేశారు.
“పరామర్శలకు వస్తే పొలిమేరల్లోనే అడ్డుకుంటాం” – గుమ్ముల మోహన్ రెడ్డి
మాజీ జెడ్పీటీసీ గుమ్ముల మోహన్ రెడ్డి మాట్లాడుతూ బీజేపీ రాష్ట్ర అధ్యక్షుడు పరామర్శల పేరుతో నల్లగొండకు వస్తే జిల్లా పొలిమేరల నుంచే అడ్డుకుని తరిమికొడతామని హెచ్చరించారు. ప్రశాంతంగా ఉన్న నల్లగొండలో రాజకీయ లబ్ధి కోసం ప్రజలను, నాయకులను రెచ్చగొడుతున్నారని ఆరోపించారు. కాంగ్రెస్ నాయకుల సహనాన్ని చేతగానితనంగా భావిస్తే బీజేపీ నేతలను జిల్లాలో ఎక్కడా తిరగకుండా చేస్తామని హెచ్చరించారు.
