- దొనకల్లు గ్రామంలో దళిత కుటుంబానికి దారి లేకుండా మహిళా సంఘ భవనం పేరిట ఆక్రమణ..
- చట్టపరమైన చర్యలు తీసుకోవాలని మాధగోని శ్రీనివాస్ గౌడ్ డిమాండ్!
నల్లగొండ,ఏపీబీ న్యూస్: ఎన్నికల్లో పోటీ చేశారనే ఒక్క కారణంతో అధికార కాంగ్రెస్ నాయకులు రాజ్యాంగ హక్కులను కాలరాస్తూ, దళిత కుటుంబాల నివాస హక్కును భంగం కలిగిస్తున్నారని బీజేపీ రాష్ట్ర కార్యవర్గ సభ్యులు మాధగోని శ్రీనివాస్ గౌడ్ తీవ్రస్థాయిలో ధ్వజమెత్తారు. నల్లగొండ మండలం దొనకల్లు గ్రామంలో బీజేపీ తరఫున సర్పంచ్గా పోటీ చేసిన కొత్తపల్లి స్వాతి – వెంకటేష్ దంపతుల ఇంటి ముందున్న గ్రామం కంట స్థలంలో ఉద్దేశపూర్వకంగా మహిళా సంఘ భవన నిర్మాణం చేపడుతూ, వారి ఇంటికి వెళ్లే దారిని అడ్డుకోవడాన్ని ఆయన తప్పుపట్టారు.
సోమవారం రోజున బీజేపీ మరియు ఎమ్మార్పీఎస్ (MRPS) నాయకులు దొనకల్లు గ్రామానికి వెళ్లి ఆ స్థలాన్ని ప్రత్యక్షంగా పరిశీలించారు. అనంతరం జిల్లా కలెక్టరేట్లో నిర్వహించిన ‘ప్రజావాణి’ (గ్రీవెన్స్ డే) కార్యక్రమంలో జిల్లా కలెక్టర్ను కలిసి సమస్యను వివరిస్తూ వినతిపత్రం సమర్పించారు.
కలెక్టర్కు అందజేసిన ఫిర్యాదు – ముఖ్యాంశాలు:
ఉద్దేశపూర్వక ఆక్రమణ: దొనకల్లులో దళిత కుటుంబానికి చెందిన కొత్తపల్లి స్వాతి గత సర్పంచ్ ఎన్నికల్లో పోటీ చేశారన్న కక్షతోనే, వారి ఇంటి ముందున్న 70 గజాల గ్రామ కంట భూమిలో భవన నిర్మాణం చేపడుతున్నారని ఆరోపించారు.
ప్రత్యామ్నాయ భూములు ఉన్నా కుట్ర: గ్రామంలో ఇతర ప్రాంతాల్లో విశాలమైన ప్రభుత్వ భూములు అందుబాటులో ఉన్నప్పటికీ, కేవలం ఈ కుటుంబం ఇల్లు వదిలి వెళ్లేలా చేయడానికి దారికి అడ్డంగా భవనం నిర్మిస్తున్నారని తెలిపారు.
దళితుల మధ్య విభేదాలు: తనపై స్వల్ప మెజార్టీతో గెలిచిన సర్పంచ్ను ముందు పెట్టి అధికార కాంగ్రెస్ నాయకులు దళితుల మధ్య విభేదాలు రేపుతూ ఈ కుట్రకు తెరలేపారని ఆరోపించారు.
రాజకీయ హింసకు పాల్పడితే ఊరుకోం – శ్రీనివాస్ గౌడ్ హెచ్చరిక
కలెక్టర్ను కలిసిన అనంతరం మాధగోని శ్రీనివాస్ గౌడ్ మాట్లాడుతూ.. దళితులు, అణగారిన వర్గాల ఓట్లతో అధికారంలోకి వచ్చిన కాంగ్రెస్ పార్టీ, ఇప్పుడు అదే వర్గాలపై రాజకీయ కక్షసాధింపులకు పాల్పడటం సరికాదన్నారు. బీజేపీ కార్యకర్తలు, నాయకులపై చట్ట వ్యతిరేక చర్యలకు పాల్పడితే చూస్తూ ఊరుకోమని, రాజ్యాంగాన్ని తుంగలో తొక్కి స్వంత సామ్రాజ్యం నడుపుతామంటే చట్టపరంగా తగిన మూల్యం చెల్లించుకోక తప్పదని హెచ్చరించారు. ఈ వ్యవహారంపై నిష్పక్షపాత విచారణ జరిపి బాధ్యులపై కఠిన చర్యలు తీసుకోవాలని కోరారు.
ఈ కార్యక్రమంలో ఎమ్మార్పీఎస్ జిల్లా అధ్యక్షుడు బకరం శ్రీనివాస్, బీజేపీ రాష్ట్ర నాయకులు పోతేపాక సాంబయ్య, మండల అధ్యక్షుడు భోగరా అనిల్ కుమార్, జిల్లా ప్రధాన కార్యదర్శి పోతేపాక లింగస్వామి, ఎస్సీ మోర్చా జిల్లా అధ్యక్షుడు బాకీ నరసింహ, అసెంబ్లీ కన్వీనర్ గాయం భూపాల్ రెడ్డి, నాయకులు కొత్తపల్లి వెంకటేష్, కోమటిరెడ్డి నరసింహారెడ్డి మరియు పెద్ద సంఖ్యలో పార్టీ శ్రేణులు, గ్రామస్థులు పాల్గొన్నారు.
