నల్లగొండ ప్రతినిధి, ఏపీబీ న్యూస్: తెలంగాణ రాష్ట్ర రాజకీయ వర్గాల్లో ఇంటెలిజెన్స్ అండ్ సెక్యూరిటీ వింగ్ తీసుకున్న ఒక సంచలన నిర్ణయం తీవ్ర కలకలం రేపుతోంది. రాష్ట్రవ్యాప్తంగా పలువురు రాజకీయ నాయకులకు కేటాయించిన వీఐపీ భద్రతను ప్రభుత్వం ఒకేసారి రద్దు చేసింది. ఈ ఊహించని పరిణామం జిల్లా రాజకీయాల్లో హాట్ టాపిక్గా మారింది. రాష్ట్రవ్యాప్తంగా మొత్తం 67 మంది ప్రముఖ నేతలకు గన్మెన్లను తొలగిస్తూ హోంశాఖ ఉత్తర్వులు జారీ చేయగా.. అందులో ఉమ్మడి నల్లగొండ జిల్లాకు చెందిన అధికార, ప్రతిపక్ష పార్టీల ముఖ్య నేతలు ఉండటం గమనార్హం.
ముఖ్యంగా ఇటీవల నల్లగొండ సీఎం బహిరంగ సభ వేదికపై భద్రతా సిబ్బందితో వాగ్వాదానికి దిగిన నల్లగొండ మేయర్ భర్త, మున్సిపల్ మాజీ చైర్మన్ బుర్రి శ్రీనివాస్ రెడ్డికి కూడా గన్మెన్ భద్రతను తొలగించడం రాజకీయంగా తీవ్ర ప్రాధాన్యత సంతరించుకుంది.
నల్లగొండలో భద్రత కోల్పోయిన ప్రముఖులు వీరే
రాష్ట్ర ఇంటెలిజెన్స్ సెక్యూరిటీ కమిటీ (Threat Perception Committee) జరిపిన తాజా సమీక్ష ఆధారంగా ఈ భద్రతను కుదించినట్లు తెలుస్తోంది. నల్లగొండ జిల్లాలో కింది ప్రముఖ నాయకులకు ఇప్పటివరకు ఉన్న గన్మెన్లను పూర్తిగా ఉపసంహరించుకున్నారు:
బుర్రి శ్రీనివాస్ రెడ్డి (కాంగ్రెస్): నల్లగొండ ప్రస్తుత మేయర్ బుర్రి చైతన్య భర్త, మున్సిపల్ మాజీ చైర్మన్.
నేతి విద్యాసాగర్ (మాజీ ఎమ్మెల్సీ): ఉమ్మడి ఆంధ్రప్రదేశ్ శాసనమండలి మాజీ డిప్యూటీ చైర్మన్, సీనియర్ నేత.
వీరెల్లి చంద్రశేఖర్ (బీజేపీ): నల్లగొండ జిల్లా భారతీయ జనతా పార్టీ సీనియర్ నాయకులు.
గోలి మధుసూదన్ రెడ్డి (బీజేపీ): జిల్లాకు చెందిన ప్రముఖ బీజేపీ సీనియర్ నేత.
ఇది కేవలం సాధారణ సమీక్షలో భాగమేనని అధికారులు చెప్తున్నారు.
నేతల్లో టెన్షన్.. ఇంటెలిజెన్స్ రిపోర్ట్ ఏం చెప్తోంది?
సాధారణంగా స్థానిక రాజకీయ సమీకరణాలు, ప్రాణహాని తదితర అంశాలపై నిఘా వర్గాలు (Intelligence Bureau) ఇచ్చే నివేదికల ఆధారంగానే నాయకులకు గన్మెన్ల భద్రతను కేటాయిస్తారు. ప్రస్తుత పరిస్థితుల్లో వీరికి ఎలాంటి ముప్పు లేదని తేలడంతోనే ప్రభుత్వం ఈ నిర్ణయం తీసుకున్నట్లు పోలీసు ఉన్నతాధికారులు స్పష్టం చేశారు. అయితే ఒక్కసారిగా గన్మెన్లను తొలగించడంపై సదరు నాయకులు అంతర్గతంగా తీవ్ర అసంతృప్తి వ్యక్తం చేస్తున్నారు. భద్రత పునరుద్ధరించాలని కోరుతూ వీరు త్వరలోనే డీజీపీని కలిసే యోచనలో ఉన్నట్లు సమాచారం.
