- జిల్లా బదిలీల లిస్ట్లో ఉండగా.. నల్లగొండలోనే కొనసాగేందుకు తెరవెనుక చక్రం తిప్పిన ఎస్ఐ!
- డిపార్ట్మెంట్ ఉన్నతాధికారులకే లీడర్తో ఫోన్ చేయించడమే శాపమైందా?
- డిసిప్లినరీ యాక్షన్లో భాగంగా సస్పెన్షన్ ఉత్తర్వులు జారీ చేసిన ఐజీ / ఎస్పీ!
నల్లగొండ టౌన్, ఏపీబీ న్యూస్: నల్లగొండ జిల్లా పోలీస్ శాఖలో రాజకీయ రికమండేషన్లు, పైరవీలు చేసే అధికారులకు ఉన్నతాధికారులు గట్టి షాక్ ఇచ్చారు. బదిలీల వ్యవహారంలో నిబంధనలు అతిక్రమించి, జిల్లాకు చెందిన ఒక ముఖ్య అధికార పార్టీ నాయకుడితో ఏకంగా పోలీస్ హెడ్క్వార్టర్స్ ఉన్నతాధికారులకే ఫోన్ చేయించి ఒత్తిడి తెచ్చినందుకు గాను.. నల్లగొండ టూ టౌన్ ఎస్ఐ(SI) సైదులు గౌడ్పై సస్పెన్షన్ వేటు పడింది. డిపార్ట్మెంట్లో అంతర్గతంగా సాగాల్సిన బదిలీల ప్రక్రియలోకి రాజకీయ నేతలను లాగడంపై ఉన్నతాధికారులు తీవ్ర ఆగ్రహం వ్యక్తం చేసినట్లు తెలుస్తోంది.
అసలేం జరిగింది? నాన్-ఫోకల్ పంచాయితీ:
విశ్వసనీయ సమాచారం ప్రకారం.. ఉమ్మడి నల్లగొండ జిల్లావ్యాప్తంగా ప్రస్తుతం పోలీస్ అధికారుల సాధారణ బదిలీల (Transfers) ప్రక్రియ నడుస్తోంది.
నాన్-ఫోకల్ లిస్ట్లో ఎస్ఐ: సుదీర్ఘ కాలంగా ఒకేచోట లేదా కీలక స్టేషన్లలో పనిచేసిన అధికారులను నిబంధనల ప్రకారం ఎలాంటి లూప్ లైన్ లేదా నాన్-ఫోకల్ (ప్రాధాన్యత లేని) పోస్టింగులకు బదిలీ చేయాలని ఉన్నతాధికారులు ఒక జాబితా సిద్ధం చేశారు. ఈ లిస్ట్లో టూ టౌన్ ఎస్ఐ సైదులు గౌడ్ పేరు కూడా ఉంది.
పొలిటికల్ ప్రెజర్: అయితే నాన్-ఫోకల్ పోస్టింగ్లో వెళ్లడం ఇష్టం లేని ఎస్ఐ సైదులు గౌడ్.. ఎలాగైనా నల్లగొండ పట్టణ పరిధిలోనే లూప్ లైన్ కాకుండా వేరే ప్రైమ్ పోస్టింగ్లో కొనసాగేందుకు ప్లాన్ చేశారు. ఇందుకోసం జిల్లాకు చెందిన ఒక టాప్ రూలింగ్ పార్టీ లీడర్ను ఆశ్రయించి, సదరు నేతతో పోలీస్ శాఖలోని అత్యున్నత అధికారికే ఫోన్ చేయించి రికమండేషన్ చేయించినట్లు డిపార్ట్మెంట్లో ప్రచారం జరుగుతోంది.
శాఖాపరమైన క్రమశిక్షణ ఉల్లంఘనగా గుర్తింపు:
పోలీస్ మాన్యువల్ ప్రకారం బదిలీల కోసం రాజకీయ నాయకుల చుట్టూ తిరగడం, వారి ద్వారా అధికారులపై ఒత్తిడి తీసుకురావడం తీవ్రమైన క్రమశిక్షణా రాహిత్యం (Disciplinary Violation) కిందికి వస్తుంది. ఎస్ఐ సైదులు గౌడ్ వ్యవహారాన్ని సీరియస్గా తీసుకున్న ఉన్నతాధికారులు.. డిపార్ట్మెంట్లో ఇలాంటి పైరవీ సంస్కృతిని సహించేది లేదనే సంకేతాలు పంపేలా తక్షణమే ఆయనను సస్పెండ్ చేస్తూ ఉత్తర్వులు జారీ చేశారు. ఈ సంచలన నిర్ణయం ఇప్పుడు ఉమ్మడి జిల్లాలోని మిగతా పోలీస్ అధికారుల్లోనూ గుబులు రేపుతోంది.
