- శంషాబాద్ ఎయిర్పోర్టులో నకిలీ ‘CISF’ అధికారి అరెస్ట్
- పెళ్లి పేరుతో 67 మందికి గాలం.. డ్రెస్ మారుస్తుండగా అడ్డంగా దొరికిపోయిన కిలేడీ!
- శ్రీకాకుళం జిల్లాకు చెందిన బాలకృష్ణను అదుపులోకి తీసుకున్న అధికారులు
- మ్యాట్రిమోనీలో పోలీస్ యూనిఫాం ఫొటోలతో యువతులకు వల
- రెండో వివాహం కోసం పక్కా స్కెచ్ – విచారణలో షాకింగ్ నిజాలు
హైదరాబాద్, ఏపీబీ న్యూస్: ప్రభుత్వ ఉద్యోగం ఉంటే చాలు.. కళ్ళు మూసుకుని నమ్మేస్తారనే నమ్మకంతో ఒక వ్యక్తి నకిలీ అధికారి అవతారమెత్తాడు. ఏకంగా సెంట్రల్ ఇండస్ట్రియల్ సెక్యూరిటీ ఫోర్స్ (CISF) యూనిఫాం ధరించి, శంషాబాద్ విమానాశ్రయంలో హల్చల్ చేస్తూ పట్టుబడ్డాడు. శ్రీకాకుళం జిల్లాకు చెందిన బాలకృష్ణ అనే ఈ నిత్య పెళ్లికొడుకు బాగోతం విచారణలో పోలీసులనే విస్తుపోయేలా చేసింది.
ఘటన నేపథ్యం:
శ్రీకాకుళం జిల్లాకు చెందిన బాలకృష్ణకు నాలుగేళ్ల క్రితమే వివాహమై ఒక కూతురు కూడా ఉంది. అయితే మొదటి భార్యతో విడాకుల అనంతరం, రెండో వివాహం చేసుకోవాలని నిర్ణయించుకున్నాడు. ఈ క్రమంలో ఏదైనా ప్రైవేట్ ఉద్యోగం అని చెబితే ఎవరూ పిల్లనివ్వరని భావించి, తప్పుడు మార్గాన్ని ఎంచుకున్నాడు.
హైటెక్ మోసం:
బాలకృష్ణ ఒక ఖరీదైన సీఐఎస్ఎఫ్ (CISF) యూనిఫాంను, నకిలీ ఐడీ కార్డులను సిద్ధం చేసుకున్నాడు.
మ్యాట్రిమోనీలో వల: పోలీస్ దుస్తుల్లో ఉన్న తన ఫొటోలను మ్యాట్రిమోనీ సైట్లలో పెట్టి, తాను ఎయిర్పోర్టులో అధికారిగా పనిచేస్తున్నానని నమ్మబలికాడు.
70 మందితో చాటింగ్: ఇప్పటివరకు సుమారు 67 నుండి 70 మంది యువతులతో టచ్లో ఉండి, వారందరినీ తన మాటలతో బురిడీ కొట్టించాడు.
ప్రభుత్వ ఉద్యోగిగా బిల్డప్: విడాకులైన ఒక యువతికి తన యూనిఫాం ఫొటోలను పంపి, కేంద్ర ప్రభుత్వ ఉద్యోగం చేస్తున్నానని నమ్మించి పెళ్లికి ఒప్పించాడు.
అడ్డంగా దొరికిపోయింది ఇలా:
మంగళవారం శంషాబాద్ ఎయిర్పోర్టులో హల్చల్ చేస్తున్న బాలకృష్ణపై అక్కడి భద్రతా సిబ్బందికి అనుమానం వచ్చింది. ఆయనను గమనిస్తుండగా, ఎయిర్పోర్టులోనే సీఐఎస్ఎఫ్ దుస్తులు మారుస్తూ అధికారుల కంటపడ్డాడు. తక్షణమే అదుపులోకి తీసుకుని విచారించగా, అతను కనీసం కానిస్టేబుల్ కూడా కాదని, అంతా నకిలీ అని తేలింది. నిందితుడి వద్ద ఉన్న యూనిఫాం, ఫోన్, నకిలీ పత్రాలను పోలీసులు స్వాధీనం చేసుకున్నారు.
విశ్లేషణ: “నకిలీలను నమ్మి మోసపోకండి”
ఇటీవల మ్యాట్రిమోనీ సైట్లలో ఇలాంటి నకిలీ అధికారుల బెడద ఎక్కువైంది. కేవలం యూనిఫాం ఫొటోలను చూసి, లేదా ఐడీ కార్డులను చూసి అప్పుడే నిర్ణయానికి రావద్దు. ఆ వ్యక్తి పనిచేసే కార్యాలయానికి వెళ్లి క్రాస్ చెక్ చేసుకోవడం ఉత్తమం. బాలకృష్ణ లాంటి కేటుగాళ్ల పట్ల యువతులు, తల్లిదండ్రులు అప్రమత్తంగా ఉండాలి.
