- 23 ఏళ్ల తర్వాత నా అక్షరాలే నాకు సాక్ష్యంగా తిరిగొచ్చాయి..
- 2003 మల్లేపల్లి అల్లర్ల నాటి ‘ఆంధ్రభూమి’ ఆర్కైవ్స్ పేజీలను సేకరించి పంపిన తెలంగాణ డీజీపీ..
- నెట్టింట వైరల్గా మారిన జర్నలిజం నిజాయితీ చాటే అరుదైన ఘట్టం..
హైదరాబాద్, ఏపీబీ న్యూస్: ఒక క్రైమ్ జర్నలిస్టు రికార్డు చేసిన నిజాయితీ గల అక్షరాలు, కాలాన్ని దాటుకుని ఏళ్ల తర్వాత ఎలా సాక్ష్యంగా నిలుస్తాయో నిరూపించే ఒక అరుదైన, భావోద్వేగపూరితమైన ఘట్టం సోషల్ మీడియా వేదికగా ఆవిష్కృతమైంది. 2003 మల్లేపల్లి అల్లర్ల వేళ నాటి డీసీపీ, నేటి తెలంగాణ డీజీపీ సీవీ ఆనంద్ (DGP CV Anand) ప్రదర్శించిన తెగువపై సీనియర్ జర్నలిస్ట్ సత్యనారాయణ వేముల ఇటీవల రాసిన జ్ఞాపకాల పోస్ట్ సోషల్ మీడియాలో భారీగా వైరల్ అయిన సంగతి తెలిసిందే.
ఈ కథనంపై ముచ్చటపడిన డీజీపీ సీవీ ఆనంద్.. 23 ఏళ్ల నాటి తన ఆర్చైవ్స్ వెతికి, నాటి ‘ఆంధ్రభూమి’ పత్రిక పేజీలను సేకరించి స్వయంగా సత్యనారాయణ వేములకు వాట్సాప్లో పంపించారు. ఆ పాత పేజీలు, అందులోని ఫోటోలు చూసి పరవశించిపోయిన జర్నలిస్ట్ మరో భావోద్వేగ పూరిత సందేశాన్ని నెటిజన్లతో పంచుకున్నారు.
‘అల్లర్లు.. అల్లాడిన మల్లేపల్లి’ – కళ్లముందు నిలిచిన 23 ఏళ్ల నాటి అక్షరాలు..
డీజీపీ సీవీ ఆనంద్ పంపిన నాటి ఆంధ్రభూమి దినపత్రిక పేజీలలో “అల్లర్లు.. అల్లాడిన మల్లేపల్లి” పేరుతో సత్యనారాయణ రాసిన కథనం, అలాగే “విధ్వంస దృశ్యాలు” శీర్షికతో ఉన్న ఫోటోల్లో నాటి డీసీపీ సీవీ ఆనంద్ చేతిలో పిస్టల్తో ఫైరింగ్ చేస్తున్న అరుదైన దృశ్యం ఉంది. ఆ వార్తలోనే ప్రత్యేక బాక్స్లో “ఆ అధికారి తెగువ ఆదర్శనీయం” అంటూ నాడు జర్నలిస్ట్ సత్యనారాయణ రాసిన వ్యాఖ్యలు స్పష్టంగా కనిపించాయి.
జర్నలిస్ట్ సత్యనారాయణ వేముల భావోద్వేగ మాటల్లో:
జ్ఞాపకానికి దక్కిన తిరుగులేని సాక్ష్యం: “23 ఏళ్ల తర్వాత ఆనంద్ గారి గురించి నేను రాసింది కాలంతో మారిపోయిన జ్ఞాపకమా అంటే కాదు.. నా కళ్లు ఏం చూశాయో నాడు నా కలం అదే నమోదు చేసింది. ఆయన కాల్పులు జరుపుతున్న క్షణాన్ని కెమెరా బంధిస్తే, ఆయన తెగువను నా అక్షరాలు నమోదు చేశాయి.”
జర్నలిజం విలువలు: “అప్పటి కథనంలో పోలీసుల వైఫల్యాన్ని నిలదీశాను, రాజకీయ ప్రభావాన్ని ప్రశ్నించాను. అదే సమయంలో ధైర్యంగా వ్యవహరించిన అధికారిని మెచ్చుకున్నాను. విమర్శించాల్సిన చోట విమర్శ, మెచ్చుకోవాల్సిన చోట ప్రశంస.. అదీ నా జర్నలిజం గీత.”
కాలం చేసిన విచిత్రం: “నేను ఆనంద్ గారికి 23 ఏళ్ల నాటి జ్ఞాపకాన్ని తిరిగి ఇస్తే.. ఆయన నాకు 23 ఏళ్ల నాటి నా జర్నలిజాన్ని, నా అక్షరాలను పత్రిక పేజీల రూపంలో తిరిగి ఇచ్చారు.”
నెట్టింట వెల్లువెత్తుతున్న ప్రశంసలు..
ఒక అధికారి ప్రజాసేవలో చూపిన ధైర్యం, దానికి నాటి జర్నలిస్ట్ ఇచ్చిన గౌరవం, మళ్లీ 23 ఏళ్ల తర్వాత వారిద్దరి మధ్య జరిగిన ఈ సంభాషణ మీడియా, పోలీస్ వ్యవస్థల మధ్య ఉన్న ఆరోగ్యకరమైన అనుబంధానికి అద్దం పడుతోందని నెటిజన్లు, జర్నలిస్టు వర్గాలు కొనియాడుతున్నాయి. కాలం మారినా, హోదాలు మారినా నిజాయితీగా నమోదైన అక్షరాలు ఎప్పటికీ సజీవంగానే ఉంటాయనడానికి ఈ సంఘటనే ప్రత్యక్ష ఉదాహరణ.
