- బ్యాంక్ మేనేజర్తో కలిసి హౌస్ కీపింగ్ ఉద్యోగి ‘ఖాతా’ల వేటు..
- ఇనాక్టివ్ ఖాతాలే లక్ష్యంగా నిందితుల మాయాజాలం
- రూ. 2,42,10,000 నగదు, ల్యాప్టాప్, 6 ఫోన్లు స్వాధీనం
- సాంకేతిక ఆధారాలతో నిందితులను పట్టుకున్న దేవరకొండ పోలీసులు
నల్లగొండ/దేవరకొండ, ఏపీబీ న్యూస్: దేవరకొండ టౌన్లోని స్టేట్ బ్యాంక్ ఆఫ్ ఇండియా (SBI) – అగ్రికల్చరల్ కమర్షియల్ బ్రాంచ్ (ACB)లో జరిగిన భారీ ఆర్థిక మోసం కేసును జిల్లా పోలీసులు అత్యంత చాకచక్యంగా ఛేదించారు. ఈ కేసులో ప్రధాన నిందితుడైన హౌస్ కీపింగ్ ఉద్యోగితో పాటు ఒక బ్యాంక్ మేనేజర్ మరియు మరో ఇద్దరిని అరెస్ట్ చేసినట్లు జిల్లా ఎస్పీ శరత్ చంద్ర పవార్ ఐపిఎస్ వెల్లడించారు.
ఘటన నేపథ్యం:
దేవరకొండ ఎస్బీఐ ఏసీబీ బ్రాంచ్లో కాంట్రాక్ట్ హౌస్ కీపింగ్ ఉద్యోగిగా పనిచేస్తున్న లెండల చక్రపాణి, బ్యాంక్లోని అంతర్గత వ్యవస్థలపై పట్టు సాధించాడు. అప్పుల బాధ నుండి గట్టెక్కేందుకు, సూర్యాపేట ఎస్బీఐ మెయిన్ బ్రాంచ్ మేనేజర్ పుట్ట వెంకట రామాంజనేయులుతో కలిసి ఈ దోపిడీకి పథకం రచించాడు.
మోసం చేసిన తీరు (Modus Operandi):
డేటా సేకరణ: గత కొన్నేళ్లుగా ఎటువంటి లావాదేవీలు జరగని (Inactive) 10 బ్యాంక్ ఖాతాల వివరాలను మేనేజర్ రామాంజనేయులు తన ఎంఐఎస్ (MIS) ద్వారా సేకరించాడు.
నకిలీ ధ్రువపత్రాలు: ఆ ఖాతాదారుల పేరుతో నకిలీ ఆధార్, పాన్ కార్డులు తయారు చేశారు.
KYC అప్డేట్: బ్యాంక్ ఉద్యోగుల లాగిన్ వివరాలను గమనించి, రద్దీ సమయాల్లో సిస్టమ్లోకి చొరబడి ఆ ఖాతాలకు కొత్త మొబైల్ నంబర్లను అప్డేట్ చేశారు.
నగదు మళ్లింపు: YONO యాప్ ద్వారా కొత్త ఐడీలను సృష్టించి, ఆ ఖాతాల్లోని నగదును కమిషన్ ఆశచూపి ఇతరుల ఖాతాలకు బదిలీ చేశారు.
గుట్టు రట్టు అయిందిలా..
హైదరాబాద్ కోటి బ్రాంచ్కు చెందిన పల్లటి నరేందర్ అనే ఖాతాదారుడి అకౌంట్లో అక్రమంగా కేవైసీ అప్డేట్ చేసినప్పుడు, అతనికి ఇ-మెయిల్ ద్వారా అలర్ట్ వెళ్ళింది. వెంటనే అతను బ్యాంక్ను సంప్రదించడంతో ఈ మొత్తం వ్యవహారం వెలుగులోకి వచ్చింది. ఏప్రిల్ 13న బ్రాంచ్ మేనేజర్ ఫిర్యాదు మేరకు పోలీసులు కేసు నమోదు చేశారు.
అరెస్ట్ అయిన నిందితులు:
- లెండల చక్రపాణి (25): ప్రధాన నిందితుడు, హౌస్ కీపింగ్ ఉద్యోగి.
- పుట్ట వెంకట రామాంజనేయులు (37): ఎస్బీఐ మేనేజర్, సూర్యాపేట బ్రాంచ్.
- కేతవత్ రాంలాల్ (35): ఎస్బీఐ రికవరీ ఏజెంట్.
- మారేపల్లి శివ (31): ఫోటోగ్రాఫర్, దేవరకొండ.
స్వాధీనం చేసుకున్న సొత్తు:
మొత్తం నగదు: రూ. 2,42,10,000/- (ఇందులో నిందితుల నుండి రూ. 1.10 కోట్లు, బెనిఫిషియరీ ఖాతాల నుండి రూ. 1.31 కోట్లు రికవరీ చేశారు).
ఎలక్ట్రానిక్ వస్తువులు: 06 స్మార్ట్ ఫోన్లు, 01 ల్యాప్టాప్.
ఈ కేసును ఛేదించడంలో కీలక పాత్ర పోషించిన దేవరకొండ డీఎస్పీ ఎం.వి. శ్రీనివాస రావు, ఇన్స్పెక్టర్ పి. వెంకట్ రెడ్డి, ఎస్సై బి. రాజు మరియు సిబ్బందిని జిల్లా ఎస్పీ గారు అభినందించారు.
విశ్లేషణ: “డిజిటల్ బ్యాంకింగ్లో జాగ్రత్త!”
బ్యాంక్ అంతర్గత సిబ్బందే ఈ మోసానికి పాల్పడటం విచారకరం. మీ బ్యాంక్ ఖాతాకు సంబంధించిన కేవైసీ అప్డేట్ లేదా మొబైల్ నంబర్ మార్పు వంటి మెసేజ్లు వచ్చినప్పుడు వెంటనే స్పందించడం వల్ల ఇలాంటి భారీ మోసాల నుండి తప్పించుకోవచ్చని ఈ ఘటన నిరూపించింది.
