నల్లగొండ, ఏపీబీ న్యూస్: రాష్ట్రవ్యాప్తంగా ప్రభుత్వ పాఠశాలల్లో విద్యార్థులు లేరనే సాకుతో ఏకంగా 16 వేల పాఠశాలల నుండి కేవలం 4,000 పాఠశాలలకు కుదించాలని చూస్తున్న తెలంగాణ రాష్ట్ర ప్రభుత్వ విద్యా వ్యతిరేక విధానాలను సీపీఎం రాష్ట్ర కార్యదర్శి John Wesley తీవ్రంగా తప్పుపట్టారు. ప్రభుత్వ విద్యా రంగాన్ని నిర్వీర్యం చేసే ఇలాంటి దుర్మార్గపు నిర్ణయాలను రాష్ట్ర ప్రభుత్వం వెంటనే ఉపసంహరించుకోవాలని ఆయన డిమాండ్ చేశారు. సోమవారం నాడు నల్లగొండలోని సీపీఎం జిల్లా కార్యాలయంలో జరిగిన జిల్లా కార్యదర్శి వర్గ సమావేశానికి ఆయన ముఖ్యఅతిథిగా హాజరయ్యారు. ఈ సందర్భంగా జాన్ వెస్లీ మాట్లాడూతూ కాంగ్రెస్ ప్రభుత్వ విద్యా, ఉద్యోగ వైఫల్యాలపై నిప్పులు చెరిగారు.
ప్రైవేట్ ఫీజుల నియంత్రణ చట్టం తేవాలి: జాన్ వెస్లీ
రాష్ట్రంలో కార్పొరేట్ విద్యాసంస్థల దోపిడీపై కాంగ్రెస్ ప్రభుత్వం మౌనం వహించడాన్ని కమ్యూనిస్టు నేత ఖండించారు. “రాష్ట్రంలో ప్రైవేట్ విద్యాసంస్థల్లో ఫీజులు ఇబ్బడిముబ్బడిగా పెంచుతుంటే ప్రభుత్వం చూస్తూ ఊరుకుంటోంది. వాటిని నియంత్రించడానికి రాష్ట్ర శాసనసభల్లో తక్షణమే ప్రైవేట్ విద్యాసంస్థల ఫీజుల నియంత్రణ చట్టాన్ని ప్రవేశపెట్టాలి” అని జాన్ వెస్లీ డిమాండ్ చేశారు.
కొత్త విద్యా సంవత్సరం ప్రారంభమైనందున ప్రభుత్వ పాఠశాలలకు సరఫరా చేసే పాఠ్యపుస్తకాలు, స్కూల్ డ్రెస్సులు మరియు విద్యార్థులకు కావలసిన అన్ని రకాల మౌలిక సదుపాయాలను వెంటనే కల్పించాలన్నారు. రాష్ట్ర విద్యా కమిషన్ ఇచ్చిన రిపోర్టు ప్రకారం అన్ని ప్రభుత్వ పాఠశాలలను బలోపేతం చేసేందుకు నాణ్యమైన ఉచిత విద్యను అందించేందుకు రాష్ట్ర ప్రభుత్వం ప్రత్యేక ప్రణాళికను రూపొందించాలని కోరారు.
హైదరాబాద్లో జూన్ 16, 17 తేదీల్లో యువజన సమ్మేళనం..
రాష్ట్రంలో మరియు దేశంలో నిరుద్యోగ సమస్య తీవ్రరూపం దాల్చడంపై సీపీఎం తన పోరాట కార్యాచరణను ప్రకటించింది:
నోటిఫికేషన్ల డిమాండ్: అన్ని ప్రభుత్వ శాఖల్లో ఖాళీగా ఉన్న ఉద్యోగాలను భర్తీ చేయడానికి కేంద్ర, రాష్ట్ర ప్రభుత్వాలు వెంటనే పక్కా టైమ్ లైన్తో కూడిన నోటిఫికేషన్లను విడుదల చేయాలి.
పాలకుల నిర్లక్ష్యం: గతంలో ఉన్న బారాస గాని, నేటి కాంగ్రెస్ గాని, 12 సంవత్సరాలుగా కేంద్రంలో అధికారంలో ఉన్న బీజేపీ గాని ప్రణాళికాబద్ధంగా ఖాళీగా ఉన్న ఉద్యోగాలను భర్తీ చేయడానికి నోటిఫికేషన్లను విడుదల చేయడం లేదని ఆందోళన వ్యక్తం చేశారు.
మహా ధర్నా కార్యాచరణ: ఈ పాలకుల నిరుద్యోగ వ్యతిరేక విధానాలకు నిరసనగా సీపీఎం ఆధ్వర్యంలో ఈనెల జూన్ 16, 17 తేదీల్లో హైదరాబాద్లో భారీ ఎత్తున యువజన సమ్మేళనం నిర్వహిస్తున్నట్లు జాన్ వెస్లీ వెల్లడించారు.
అలాగే, ఎన్నికల సంఘం ప్రత్యేక ఓటర్ల సవరణ జాబితాను ఎలాంటి భావద్వేషాలకు తావు లేకుండా నిష్పక్షపాతంగా చేపట్టాలని కోరారు. ఇటీవల జరిగిన సర్వేల పేరిట అర్హులైన ఓటర్లను కూడా తొలగించారని, తెలంగాణలో జరిగే ఓటర్ల సర్వే పారదర్శకంగా, అన్ని పార్టీల ప్రతినిధుల సమక్షంలో జరగాలని స్పష్టం చేశారు. జూన్, జూలై, ఆగస్టు మాసాలలో సీపీఎం పార్టీ ఆధ్వర్యంలో విద్యా, వైద్యం, నిరుద్యోగం మరియు రేషన్ షాపుల్లో 14 రకాల నిత్యవసర వస్తువులను సరఫరా చేయాలని డిమాండ్ చేస్తూ పెద్ద ఎత్తున ఆందోళన పోరాటాలు నిర్వహిస్తామని పార్టీ శ్రేణులకు పిలుపునిచ్చారు.
యూరియా యాప్ను రద్దు చేయకపోతే ఉద్యమం: జూలకంటి రంగారెడ్డి
ఈ సమావేశంలో పాల్గొన్న సీపీఎం రాష్ట్ర కార్యదర్శి వర్గ సభ్యులు, మాజీ ఎమ్మెల్యే జూలకంటి రంగారెడ్డి మాట్లాడుతూ వ్యవసాయ సీజన్ ప్రారంభమైనందున రైతులకు అన్ని రకాల ఎరువులు, విత్తనాలను అందుబాటులో ఉంచాలని ప్రభుత్వాన్ని కోరారు. గత యాసంగిలో సగం నిలిపివేసిన రైతు భరోసా నిధులతో పాటు ఈ ఖరీఫ్ రైతు భరోసా నిధులను తక్షణమే విడుదల చేయాలని డిమాండ్ చేశారు. రైతులను ఇబ్బంది పెడుతున్న యూరియా అమ్మకం యాప్ను తక్షణమే రద్దు చేయాలని కోరారు. అన్ని సహకార సంఘాలలో యూరియా, డీఏపీ (DAP) లభ్యత ఉంచకపోతే రైతులను సమీకరించి పెద్ద ఎత్తున ఉద్యమం చేస్తామని హెచ్చరించారు.
ఈ ఉన్నత స్థాయి సమావేశంలో సీపీఎం జిల్లా కార్యదర్శి తుమ్మల వీరారెడ్డి, జిల్లా కార్యదర్శి వర్గ సభ్యులు ముదిరెడ్డి సుధాకర్ రెడ్డి, నారి ఐలయ్య, డబ్బికార్ మల్లేశం, బండా శ్రీశైలం, పాలడుగు నాగార్జున, కందాల ప్రమీల తదితరులు పాల్గొన్నారు.
