- కేటీఆర్ వి అన్నీ దిక్కుమాలిన అడ్డగోలు సోషల్ మీడియా సర్వేలే..! ప్రభుత్వ విప్ వేముల వీరేశం ఫైర్
- పదేళ్లు రాష్ట్రాన్ని దోచుకుని మాపై అసత్య ప్రచారాలా?
- కేసీఆర్ హయాంలో ‘బంగారు తెలంగాణ’ అని చెప్పి ఖజానాను విధ్వంసం చేశారు!
- ఆరు గ్యారంటీలతో ఇందిరమ్మ రాజ్యం.. ఇప్పటికే 67,000 ప్రభుత్వ ఉద్యోగాల భర్తీ!
- మంత్రిగా ఉన్నప్పుడు శని, ఆదివారాలు ఫోన్ స్విచ్ ఆఫ్ చేసుకున్న కేటీఆర్ మాకు నీతులు చెబుతారా?
హైదరాబాద్ బ్యూరో, ఏపీబీ న్యూస్: “రాష్ట్రంలో ఎన్నికలు ఎప్పుడు వచ్చినా ప్రజలు బీఆర్ఎస్కు గుండుసున్నా ఇస్తూ తిరస్కరిస్తున్నా ఆ పార్టీ నేతలకు బుద్ధి రావడం లేదు” అని ప్రభుత్వ విప్, నకిరేకల్ ఎమ్మెల్యే వేముల వీరేశం మండిపడ్డారు. గాంధీ భవన్లో నిర్వహించిన మీడియా సమావేశంలో ఆయన కేటీఆర్ (KTR) వైఖరిపై పదునైన విమర్శనాస్త్రాలు సంధించారు. అడ్డగోలు సర్వేలు చేయించుకుంటూ మళ్లీ మేమే వస్తామంటూ సోషల్ మీడియాలో డ్రామాలు ఆడటం బీఆర్ఎస్కు అలవాటుగా మారిందని ధ్వజమెత్తారు.
పదేళ్ల బీఆర్ఎస్ పాలనంతా దొల్ల – ఖజానా విధ్వంసం:
గత పదేళ్ల బీఆర్ఎస్ పాలనలో జరిగిన అక్రమాలను వేముల వీరేశం ఈ సందర్భంగా గుర్తుచేశారు:
పైకి బంగారం.. లోపల దొల్ల: “గత ప్రభుత్వం పైకి మాత్రం ‘బంగారు తెలంగాణ’ అని కలరింగ్ ఇచ్చింది. కానీ లోపల అంతా దొల్లగా మార్చి రాష్ట్ర ఖజానాను పూర్తిగా విధ్వంసం చేశారు. అభివృద్ధి పేరుతో వందల కోట్ల దోపిడీలు, అక్రమాలకు పాల్పడి రాష్ట్రాన్ని అప్పుల పాలు చేశారు” అని ఆరోపించారు.
ఉద్యమకారులకు ద్రోహం: సొంత పార్టీ నాయకులను, నాడు ప్రాణాలు పణంగా పెట్టిన తెలంగాణ ఉద్యమకారులను సైతం మోసం చేసిన చరిత్ర కేటీఆర్ కుటుంబానిదేనని దుయ్యబట్టారు. కేటీఆర్ ఐటీ మంత్రిగా ఉన్న సమయంలో శని, ఆదివారాలు వస్తే చాలు ఫోన్ స్విచ్ ఆఫ్ చేసుకుని ప్రజలకు, క్యాడర్కు అందుబాటులో ఉండేవారు కాదని, అలాంటి వ్యక్తి నేడు కాంగ్రెస్పై మాట్లాడటం హాస్యాస్పదంగా ఉందన్నారు.
67 వేల ఉద్యోగాలతో నిరుద్యోగులకు న్యాయం:
ముఖ్యమంత్రి రేవంత్ రెడ్డి నేతృత్వంలో కాంగ్రెస్ ప్రభుత్వం తెలంగాణకు శ్రీరామరక్షగా నిలిచి ప్రజాపాలన సాగిస్తోందని వేముల వీరేశం స్పష్టం చేశారు.
ఉద్యోగాల విప్లవం: బీఆర్ఎస్ హయాంలో పేపర్లు లీక్ చేస్తూ నిరుద్యోగుల జీవితాలతో ఆడుకుంటే.. కాంగ్రెస్ అధికారంలోకి వచ్చిన కొద్ది రోజుల్లోనే రికార్డు స్థాయిలో 67,000 ప్రభుత్వ ఉద్యోగాలను కల్పించి యువతకు న్యాయం చేసిందని లెక్కలతో వివరించారు.
సంక్షేమ ఫలాలు: మహిళలకు ఉచిత బస్సు ప్రయాణం, 200 యూనిట్ల వరకు గృహజ్యోతి ఉచిత విద్యుత్, ఇందిరమ్మ ఇళ్ల నిర్మాణం, పేదలకు సన్నబియ్యంతో అన్నం పెట్టడం వంటి విప్లవాత్మక పథకాలను విజయవంతంగా అమలు చేస్తున్నట్లు తెలిపారు. అర్హత ఉన్న ప్రతి కుటుంబానికి అడిగిన వెంటనే కొత్త రేషన్ కార్డులు ఇచ్చేందుకు ప్రభుత్వం సిద్ధంగా ఉందన్నారు.
నాడు చెరువుల కబ్జా.. డ్రగ్స్ హబ్:
గత ప్రభుత్వ హయాంలో రాష్ట్రంలో భూకబ్జాలు విపరీతంగా పెరిగిపోయాయని, అనేక చెరువులు ఆక్రమణలకు గురయ్యాయని వేముల వీరేశం ఆరోపించారు. “నాడు మీ చేతకానితనం వల్లే తెలంగాణను డ్రగ్స్ కేంద్రంగా మార్చారు. ఆ భయంకరమైన పరిస్థితులను రాష్ట్ర ప్రజలు ఎప్పటికీ మర్చిపోలేరు. ఇప్పటికైనా అసత్య ప్రచారాలు మానుకోకపోతే ప్రజలు తగిన బుద్ధి చెబుతారు” అని కేటీఆర్ను హెచ్చరించారు.
