Breaking News: మిర్యాలగూడ ఫ్లాట్ కొనుగోలుదారులు జర భద్రం.. మున్సిపాలిటీలో దళారుల వసూళ్ల దందా..

మిర్యాలగూడ బ్యూరో, ఏపీబీ న్యూస్: నల్లగొండ జిల్లా మిర్యాలగూడ పట్టణంలో కొత్తగా నిర్మించిన అపార్ట్మెంట్లలో ఫ్లాట్లు కొనుగోలు చేసిన మధ్యతరగతి ప్రజలే లక్ష్యంగా కొందరు దళారులు, రాజకీయ ప్రతినిధుల అండతో వసూళ్ల దందాకు తెరలేపారు. సొంత ఇల్లు నిర్మించుకునే స్తోమత లేక, బ్యాంకు రుణాలు తెచ్చుకుని ఫ్లాట్ కొనుక్కున్న సామాన్యుల రక్తాన్ని జలగల్లా పీల్చేందుకు ముఠాలు రంగంలోకి దిగాయి. ఈ తాజా వ్యవహారం ఇప్పుడు పట్టణంలో తీవ్ర కలకలం రేపుతోంది.

మరోవైపు, గతంలో మిర్యాలగూడ మున్సిపాలిటీలో ఏసీబీ (ACB) దాడులు జరిగిన సమయంలో ఫోన్ స్విచ్ఛాఫ్ చేసుకుని పరారైన వివాదాస్పద మున్సిపల్ ఇంజనీర్ వెంకన్న.. రాజకీయ పలుకుబడితో మళ్లీ మిర్యాలగూడకే బదిలీపై వచ్చేందుకు తెరవెనుక ముమ్మర ప్రయత్నాలు చేయడం స్థానికంగా పెద్ద ఎత్తున చర్చనీయాంశమైంది.

ఆక్యుపెన్సీ సర్టిఫికేట్ వచ్చినా.. ‘టాక్స్’ పేరుతో ఐదు వేల ముడుపులు!

సాధారణంగా కొత్తగా ఫ్లాట్ కొనుగోలు చేసి రిజిస్ట్రేషన్ చేసుకునే సమయంలోనే, మున్సిపల్ ప్రాపర్టీ (ఆస్తిపన్ను) అసెస్మెంట్ కోసం సబ్ రిజిస్ట్రార్ కార్యాలయంలోనే నిర్ణీత ప్రభుత్వ రుసుమును వసూలు చేస్తారు. ఈ నిబంధనలపై అవగాహన ఉన్న యజమానులు రిజిస్ట్రేషన్ సమయంలోనే చలాన్ రూపంలో డబ్బులు చెల్లిస్తున్నారు.

అయితే, మిర్యాలగూడలో తిరుగుతున్న కొందరు దళారులు.. ఫ్లాట్ నంబర్ కేటాయింపు పేరుతో ప్రతి ఫ్లాట్ యజమాని నుండి రూ. 4,000 నుండి రూ. 5,000 వరకు లంచం/ముడుపులు ఇవ్వాలని డిమాండ్ చేస్తున్నారు.

అతితెలివి ప్రదర్శిస్తున్న బ్రోకర్లు: రిజిస్ట్రేషన్ సమయంలోనే డబ్బులు కట్టాం కదా.. మళ్లీ ఎందుకు ఇవ్వాలని ప్రశ్నిస్తే, “మీ అపార్ట్మెంట్ నిబంధనల మేరకు నిర్మించలేదు” అంటూ బెదిరింపులకు దిగుతున్నారు.

బాధితుల ప్రశ్న: అపార్ట్మెంట్ నిర్మాణం పూర్తయ్యాక మున్సిపల్ అధికారులు అన్ని నిబంధనలు పరిశీలించే ‘ఆక్యుపెన్సీ సర్టిఫికేట్’ (Occupancy Certificate) జారీ చేస్తారు. అలాంటప్పుడు నిబంధనల ఉల్లంఘన ఎక్కడ జరిగింది? అని ప్రశ్నిస్తే.. “మీకు ఆస్తి పన్ను (Property Tax) తక్కువ వేయించాలంటే ముడుపులు ముట్టచెప్పాల్సిందే” అని దళారులు బేరసారాలు సాగిస్తున్నారు.

ఎన్నికల ఖర్చు సామాన్యుల నెత్తినా? పాలకులకు ప్రజల ప్రశ్నలు

రాష్ట్రంలో, మిర్యాలగూడ నియోజకవర్గంలో మరియు మున్సిపాలిటీలో ప్రస్తుతం కాంగ్రెస్ పార్టీ అధికారంలో ఉంది. తాము గత పాలకుల కంటే సొక్కం, నిజాయితీ పరులమని చెప్పుకునే రాజకీయ నాయకులు ఈ వసూళ్ల దందాపై మిర్యాలగూడ ప్రజలకు జవాబు చెప్పాలని బాధితులు డిమాండ్ చేస్తున్నారు.

పట్టణ సామాన్యుల ఆవేదన – నిలదీత:

“మున్సిపాలిటీలో అధికారం చేజిక్కించుకోవడానికి వార్డు కౌన్సిలర్లు ఎన్నికల్లో లక్షలాది రూపాయలు ఖర్చు పెట్టి ఉండవచ్చు. కానీ ఓటర్లు ఎవరైనా డబ్బులిస్తేనే ఓట్లు వేస్తామని అడిగారా? మీకు తీటబట్టి ఎన్నికల్లో ఖర్చు పెట్టినంత మాత్రాన, మధ్యతరగతి సామాన్య ప్రజల మీద అక్రమ సంపాదన కోసం దళారులను వదిలి జనం రక్తం పీలుస్తారా? ‘మా రాజకీయం ఇంతే’ అని సమర్థించుకుంటారా? ఈ అక్రమ వసూళ్లను తక్షణమే అరికట్టాలి.” అని స్థానికులు ఆగ్రహం వ్యక్తం చేస్తున్నారు.

ఏసీబీకి చిక్కని ఇంజనీర్ వెంకన్న.. మళ్లీ మిర్యాలగూడకేనా?

మిర్యాలగూడ మున్సిపాలిటీలో సుమారు రెండు నెలల క్రితం అవినీతి నిరోధక శాఖ (ACB) అధికారులు మెరుపు దాడులు నిర్వహించిన సంగతి తెలిసిందే. అప్పటి మున్సిపల్ కమిషనర్, టౌన్ ప్లానింగ్ అధికారులు ఏసీబీ నిఘాలో చిక్కారు.

ఫోన్ స్విచ్ఛాఫ్ చేసి పరార్: ఆ సమయంలో తీవ్ర అవినీతి ఆరోపణలు ఎదుర్కొన్న మున్సిపల్ ఇంజనీర్ వెంకన్నకు ఏసీబీ అధికారులు ఫోన్ చేయగా.. “వస్తున్నా” అని చెప్పి డిపార్ట్మెంట్ ఫోన్ స్విచ్ఛాఫ్ చేసుకొని పరారయ్యారు.

మళ్లీ అదే సీటు కోసం ట్రై: ఆ ఉదంతం తర్వాత వెంకన్నను మిర్యాలగూడ మున్సిపాలిటీ నుండి బదిలీ (Transfer) చేశారు. ఆయన రిలీవ్ అయి వెళ్లినప్పటికీ.. నేటికీ మిర్యాలగూడ మున్సిపాలిటీకి కొత్త ఇంజనీర్ను ప్రభుత్వం నియమించలేదు. కోసమెరుపు ఏమిటంటే, సదరు ఇంజనీర్ వెంకన్న ప్రభుత్వానికి సంబంధించిన డిపార్ట్మెంట్ మొబైల్ నంబర్ను ఇంకా తన వద్దే ఉంచుకుని, తనకున్న రాజకీయ పలుకుబడితో మళ్లీ మిర్యాలగూడ మున్సిపాలిటీకే ట్రాన్స్ఫర్ చేయించుకోవడానికి జోరుగా ప్రయత్నాలు సాగిస్తున్నట్లు సమాచారం.

ఇలాంటి అవినీతి ఆరోపణలు ఉన్న అధికారులు మళ్లీ వస్తే మిర్యాలగూడ మున్సిపాలిటీ అవినీతి మయంగా మారుతుందని పట్టణ ప్రజలు ఆందోళన చెందుతున్నారు. నల్గొండ జిల్లా కలెక్టర్, స్థానిక ఎమ్మెల్యే, కాంగ్రెస్ ప్రభుత్వం స్పందించి తక్షణమే మిర్యాలగూడ మున్సిపాలిటీకి నూతన, నిజాయితీ గల మున్సిపల్ ఇంజనీర్ను నియమించాలని, దళారుల దోపిడీ నుండి మున్సిపాలిటీని కాపాడాలని పట్టణ వాసులు కోరుతున్నారు.