- ప్రభుత్వ సెలవు రోజూ బుక్స్, యూనిఫామ్ల దందా..
- సాక్ష్యాలున్నా విద్యాశాఖ నిమ్మకు నీరెత్తినట్లు?
రంగారెడ్డి జిల్లా బ్యూరో, ఏపీబీ న్యూస్: రంగారెడ్డి జిల్లా బాలాపూర్ మండల పరిధిలో ప్రైవేట్ విద్యాసంస్థల నిబంధనల ఉల్లంఘనలు మరోసారి తీవ్ర చర్చనీయాంశంగా మారాయి. బి.ఎన్.రెడ్డి నగర్ (వినాయక హిల్స్) లో ఉన్న ‘శ్రీ త్రివేణి’ పాఠశాల యాజమాన్యం తీరుపై స్థానికులు, విద్యార్థుల తల్లిదండ్రుల నుంచి తీవ్ర విమర్శలు వ్యక్తమవుతున్నాయి. సదరు పాఠశాలకు అసలు ప్రభుత్వ అనుమతులే లేవనే ఆరోపణలు బలంగా వినిపిస్తుండగా.. తాజాగా ప్రభుత్వ అధికారిక సెలవు దినమైన మొహరం పండుగ రోజున కూడా స్కూల్ తెరిచి వ్యాపార దందా సాగించడం స్థానికంగా కలకలం రేపింది.
ఈ వివాదాస్పద ఉదంతం జూన్ 26న వెలుగులోకి వచ్చింది. పండుగ సెలవు రోజున విద్యార్థులకు సెలవు ప్రకటించినట్లే ప్రకటించి, లోపల మాత్రం కమర్షియల్ విక్రయాలు జరపడంపై విద్యాశాఖ అధికారుల పర్యవేక్షణ లోపం స్పష్టంగా కనిపిస్తోందని విమర్శలు వస్తున్నాయి.
సాక్ష్యాలతో దొరికిపోయిన త్రివేణి యాజమాన్యం
ప్రభుత్వ క్యాలెండర్ నిబంధనల ప్రకారం మొహరం పండుగకు విద్యాసంస్థలన్నింటికీ సెలవు ప్రకటించాల్సి ఉంది. కానీ, ‘శ్రీ త్రివేణి’ పాఠశాల యాజమాన్యం లాభాలే ధ్యేయంగా కొంతమంది సిబ్బందిని బలవంతంగా విధులకు రప్పించినట్లు తెలుస్తోంది.
బహిరంగ విక్రయాలు: జూన్ 26 ఉదయం వేళలో పాఠశాల ప్రధాన గేట్లు తెరిచి ఉంచడమే కాకుండా.. పాఠశాల ప్రాంగణానికి పక్కనే ఉన్న ఒక షెట్టర్లో విద్యార్థులకు అవసరమైన పాఠ్యపుస్తకాలు, నోట్బుక్స్, స్కూల్ యూనిఫామ్స్, టై, బెల్టులతో కూడిన స్టేషనరీ సామగ్రిని బహిరంగంగానే విక్రయించారు.
కెమెరాకు చిక్కిన దృశ్యాలు: విద్యాశాఖ నిబంధనలను తుంగలో తొక్కి సెలవు రోజున జరుపుతున్న ఈ దందాకు సంబంధించిన దృశ్యాలు, స్కూల్ గేట్లు తెరిచి ఉన్న విజువల్స్ సాక్ష్యాలతో సహా స్పష్టంగా దొరికిపోయాయి.
అధిక ధరలతో తల్లిదండ్రులపై మోయలేని భారం
ప్రైవేట్ విద్యాసంస్థల ప్రాంగణాల్లో లేదా వాటి అనుబంధ షెట్టర్లలో ఎలాంటి పుస్తకాలు, యూనిఫామ్లు విక్రయించకూడదనే కఠినమైన విద్యాశాఖ నిబంధనలు ఉన్నాయి. అయినప్పటికీ వాటిని ఏమాత్రం కేర్ చేయకుండా పాఠశాలను ఒక పక్కా వ్యాపార కేంద్రంగా మార్చారని తల్లిదండ్రులు మండిపడుతున్నారు.
బయట మార్కెట్ ధరల కంటే ఇక్కడ ‘శ్రీ త్రివేణి’ స్కూల్లో విక్రయిస్తున్న పుస్తకాలు, యూనిఫామ్ల ధరలు చాలా ఎక్కువగా ఉన్నాయని, కొనుగోలు చేయకపోతే పిల్లలను ఇబ్బంది పెడతారనే భయంతోనే తాము ఎక్కువ డబ్బులు కట్టాల్సి వస్తోందని తల్లిదండ్రులు ఆందోళన వ్యక్తం చేస్తున్నారు. కనీస అనుమతులు లేని స్కూల్లో.. పైగా సెలవు రోజుల్లో ఇలాంటి విక్రయాలు జరపడం వెనుక ఏ ఉన్నతాధికారి లేదా రాజకీయ నేత అండదండలు ఉన్నాయనే అనుమానాలు స్థానికంగా బలపడుతున్నాయి.
ప్రేక్షక పాత్రలో విద్యాశాఖ.. స్పందించని డీఈఓ (DEO)
ఈ పాఠశాల అక్రమ వసూళ్లు, కమర్షియల్ దందా మరియు పర్మిషన్ల అంశంపై గతంలో పలుమార్లు ఉన్నతాధికారులకు రాతపూర్వక ఫిర్యాదులు అందినప్పటికీ, విద్యాశాఖ అధికారులు ఎలాంటి చర్యలు తీసుకోకుండా చోద్యం చూస్తున్నారనే విమర్శలు వెల్లువెత్తుతున్నాయి. అధికారుల పర్యవేక్షణ లోపం, మామూళ్ల మత్తు వల్లే పాఠశాల యాజమాన్యం ఇంతలా బరితెగించి వ్యవహరిస్తోందని స్థానికులు బహిరంగంగానే ఆరోపిస్తున్నారు. ఈ తీవ్ర అంశంపై రంగారెడ్డి జిల్లా విద్యాశాఖ అధికారి (DEO) వివరణ కోరేందుకు ‘మొబైల్’ ద్వారా సంప్రదించేందుకు ప్రయత్నించగా, DEO అందుబాటులోకి రాలేదు. ఇప్పటికైనా ఉన్నతాధికారులు తక్షణమే స్పందించి, అనుమతులు లేకుండా నడుస్తున్న ‘శ్రీ త్రివేణి’ పాఠశాలపై సమగ్ర విచారణ జరిపి, ప్రభుత్వ నిబంధనలు ఉల్లంఘించిన బాధ్యులపై చట్టపరమైన కఠిన చర్యలు తీసుకోవాలని విద్యార్థుల తల్లిదండ్రులు, స్థానిక ప్రజా సంఘాలు గట్టిగా డిమాండ్ చేస్తున్నాయి.
