- యాదాద్రి ప్లాంట్లో 21 శాతానికే పరిమితమైన విద్యుత్ ఉత్పత్తి
- కావాల్సిన బొగ్గులో కేవలం 24 శాతం నిల్వలు మాత్రమే అందుబాటులో ఉన్నట్లు తేల్చిన CEA!
- గత ఐదేళ్లలో ఎన్నడూ లేని విధంగా 58 మిలియన్ టన్నులకు పడిపోయిన సింగరేణి వార్షిక ఉత్పత్తి!
- యాదాద్రి థర్మల్ ప్లాంట్కు ముంచుకొస్తున్న అంధకారం.. కనీస నిల్వల్లో కేవలం 18 శాతమే నిలిచింది!
హైదరాబాద్, ఏపీబీ న్యూస్: తెలంగాణ రాష్ట్రానికి కాంతినిచ్చే థర్మల్ పవర్ స్టేషన్లకు ఇంధన గండం ముంచుకొస్తోంది. సింగరేణి కాలరీస్ కంపెనీ లిమిటెడ్ (SCCL) లో బొగ్గు ఉత్పత్తి భారీగా క్షీణించడంతో.. రాష్ట్రంలోని జెన్కో (TS Genco) పరిధిలోని విద్యుత్ ఉత్పత్తి కేంద్రాల్లో బొగ్గు నిల్వలు నిండుకుంటున్నాయి. ఈ నెల 13వ తేదీ నాటి గణాంకాల ఆధారంగా కేంద్ర విద్యుత్ మండలి (CEA) విడుదల చేసిన నివేదిక రాష్ట్రంలో నెలకొన్న భయానక బొగ్గు కొరతను కళ్లకు కట్టింది.
కేంద్ర విద్యుత్ మండలి (CEA) నివేదికలోని సంచలన నిజాలు:
24 శాతానికే పరిమితం: తెలంగాణలోని విద్యుత్ ఉత్పత్తి కేంద్రాల్లో ఈ నెల 13వ తేదీ నాటికి కనీసం 25.54 లక్షల మెట్రిక్ టన్నుల బొగ్గు నిల్వలు ఉండాల్సి ఉంది. కానీ క్షేత్రస్థాయిలో కేవలం 24 శాతం, అంటే 6.09 లక్షల మెట్రిక్ టన్నులు మాత్రమే అందుబాటులో ఉన్నాయి.
సింగరేణి ఘోర వైఫల్యం: గత ఐదేళ్ల ట్రాక్ రికార్డును పరిశీలిస్తే ఎన్నడూ లేని విధంగా గత ఏడాది సింగరేణి బొగ్గు ఉత్పత్తి ఏకంగా 58 మిలియన్ టన్నులకు పడిపోయింది.
వివరాలు దాచేస్తున్న సింగరేణి: దేశంలోని అన్ని బొగ్గు ఉత్పత్తి సంస్థలు తమ రోజువారీ మైనింగ్ వివరాలను పారదర్శకంగా వెబ్సైట్లో ఉంచాలనే నిబంధన ఉంది. అయితే ఉత్పత్తి 58 మిలియన్ టన్నులకు పడిపోవడంతో.. పరువు పోతుందనే ఉద్దేశంతో సింగరేణికి చెందిన ఒక ఉన్నతాధికారి ఈ వివరాలను వెబ్సైట్లో పెట్టొద్దని మౌఖిక ఆదేశాలు జారీ చేసినట్లు సంచలన సమాచారం బయటపడింది.
యాదాద్రి థర్మల్ పవర్ ప్లాంట్కు బొగ్గు దెబ్బ:
దామరచర్లలోని యాదాద్రి అల్ట్రా మెగా థర్మల్ పవర్ ప్లాంట్ (YTPS) బొగ్గు కొరత వల్ల తీవ్రంగా నష్టపోతోంది.
అవసరానికి తగ్గ సరఫరా: ఈ ప్లాంట్లో పూర్తి స్థాయి విద్యుత్ ఉత్పత్తికి రోజుకు 43,700 టన్నుల బొగ్గు అవసరం కాగా.. ఈ నెల 13వ తేదీన సింగరేణి నుండి కేవలం 13,500 టన్నులు మాత్రమే సరఫరా అయింది. దీనివల్ల ప్లాంట్లో కేవలం 21 శాతం మాత్రమే విద్యుత్ ఉత్పత్తి సాధ్యపడింది.
కనీస నిల్వలు నిల్: యాదాద్రి ప్లాంట్ అత్యవసర పరిస్థితుల కోసం కనీసం 11.32 లక్షల టన్నుల బొగ్గును రిజర్వ్గా ఉంచుకోవాలి. కానీ ప్రస్తుతం అక్కడ కేవలం 18 శాతం, అంటే 2,03,760 టన్నుల నిల్వలు మాత్రమే మిగిలి ఉండడం గమనార్హం.
రంగంలోకి దిగిన కేంద్రం – సింగరేణికి ఆదేశాలు:
తెలంగాణ జెన్కో కేంద్రాలలో బొగ్గు కొరత వల్ల రాష్ట్రం అంధకారంలోకి వెళ్లే ప్రమాదం ఉందని గుర్తించిన కేంద్ర విద్యుత్ మండలి (CEA) ఈ వ్యవహారంపై సీరియస్ అయింది. రాష్ట్రంలో విద్యుత్ డిమాండ్కు తగినట్లుగా థర్మల్ కేంద్రాలకు బొగ్గు సరఫరాను తక్షణమే పెంచాలని సింగరేణి యాజమాన్యాన్ని డీఈసీ/సీఈసీ ఆదేశించింది. మరి ఈ బొగ్గు సంక్షోభం నుండి గట్టెక్కేందుకు రాష్ట్ర ప్రభుత్వం, సింగరేణి అధికారులు ఎలాంటి ప్రత్యామ్నాయ చర్యలు చేపడతారో చూడాల్సి ఉంది.
