నాగర్కర్నూల్/తిమ్మజిపేట, ఏపీబీ న్యూస్: అధికార గర్వంతో సామాన్యులను పీడించి, లంచాల కోసం వేధించే ఒక అవినీతి అధికారి అంతం ఎలా ఉంటుందో నాగర్కర్నూల్ జిల్లా తిమ్మజిపేటలో కళ్ళకు కట్టినట్లు కనిపించింది. రూ. 25 వేలు లంచం తీసుకుంటూ ఏసీబీ (ACB) అధికారులకు రెడ్ హ్యాండెడ్గా చిక్కిన తిమ్మజిపేట ఎస్సై హరిప్రసాద్ రెడ్డి ఉదంతం ఇప్పుడు రాష్ట్రవ్యాప్తంగా చర్చనీయాంశమైంది.
అసలేం జరిగింది?
ఇసుక అక్రమ రవాణా కేసులో సీజ్ చేసిన ఒక ట్రాక్టర్ మరియు జేసీబీని విడిచిపెట్టేందుకు ఎస్సై హరిప్రసాద్ రెడ్డి బాధితుడి నుండి భారీగా లంచం డిమాండ్ చేశాడు. చివరకు రూ. 25 వేలు ఇస్తేనే వాహనాలు వదులుతానని భీష్మించుకోవడంతో, విసిగిపోయిన బాధితుడు ఏసీబీ అధికారులను ఆశ్రయించాడు.
సోమవారం బాధితుడి నుంచి ఎస్సై హరిప్రసాద్ రెడ్డి నగదు తీసుకుంటుండగా, ముందే మాటువేసిన ఏసీబీ అధికారులు అతడిని పట్టుకున్నారు. ఎస్సై చేతులు రసాయన పరీక్షల్లో పాజిటివ్గా తేలడంతో అతడిని అదుపులోకి తీసుకుని విచారిస్తున్నారు.
చరిత్రలో నిలిచిపోయే ‘సంబరాలు’
సాధారణంగా ఒక పోలీసు అధికారిపై చర్యలు తీసుకుంటే ప్రజలు నిశ్శబ్దంగా గమనిస్తారు. కానీ, తిమ్మజిపేటలో సీన్ రివర్స్ అయింది. ఎస్సై హరిప్రసాద్ రెడ్డి ఏసీబీకి చిక్కాడని తెలియగానే బాధితులు, స్థానికులు పెద్ద ఎత్తున అంబేద్కర్ చౌరస్తాకు చేరుకున్నారు:
టపాకాయల మోత: పెను వేధింపుల నుంచి విముక్తి లభించిందన్న ఆనందంతో బాధితులు బాంబులు, టపాకాయలు కాల్చి సంబరాలు చేసుకున్నారు.
నినాదాలు: “అవినీతి ఎస్సై డౌన్ డౌన్” అంటూ నినాదాలతో హోరెత్తించారు.
బాధితుల ఆరోపణలు: “సీసీ కెమెరాల ఏర్పాటు పేరుతో ప్రతి గ్రామంలో అడ్డగోలుగా వసూళ్లు చేశాడు. భూతగాదాలు, సివిల్ పంచాయితీల్లో తలదూర్చి లక్షల రూపాయలు దండుకున్నాడు. డబ్బులు ఇవ్వని వారిని స్టేషన్కు పిలిపించి దారుణంగా కొట్టేవాడు” అని బాధితులు తమ ఆవేదనను మీడియా ముందు వెళ్లగక్కారు.
విశ్లేషణ: “ఖాకీకి మచ్చ.. ప్రజల విజయం”
రక్షక భటుడే భక్షకుడిగా మారితే సామాన్యుడికి దిక్కు ఎవరు? తిమ్మజిపేట ఎస్సై వ్యవహారశైలి పోలీసు వ్యవస్థకే మచ్చ తెచ్చింది. ప్రజలు రోడ్డుపైకి వచ్చి బాంబులు కాల్చి సంబరాలు చేసుకుంటున్నారంటే, ఆ అధికారి పట్ల ప్రజల్లో ఎంతటి కసి, ఆవేదన ఉన్నాయో అర్థం చేసుకోవచ్చు. ఇది కేవలం ఒక ఎస్సై అరెస్ట్ మాత్రమే కాదు.. అవినీతి అధికారులందరికీ ఒక హెచ్చరిక. చట్టం తన పని తాను చేసినప్పుడు, ప్రజల నుంచి వచ్చే స్పందన ఇలాగే ఉంటుంది.
