నల్లగొండ, ఏపీబీ న్యూస్: నల్లగొండ జిల్లాను డ్రగ్స్ రహిత జిల్లాగా మార్చాలన్న ఎస్పీ శరత్ చంద్ర పవార్ ఆదేశాల మేరకు పోలీసులు మరో కీలక విజయం సాధించారు. పట్టణ శివారులో గుట్టుచప్పుడు కాకుండా గంజాయి విక్రయిస్తున్న నలుగురు సభ్యుల ముఠాను నల్లగొండ వన్ టౌన్ పోలీసులు అరెస్ట్ చేశారు.
శ్మశాన వాటిక సమీపంలో ఆకస్మిక దాడి
నల్లగొండ పట్టణ శివారులోని మునుగోడు రోడ్డు, గణేష్ నగర్ కాలనీ శ్మశాన వాటిక సమీపంలో కొంతమంది గంజాయి విక్రయిస్తున్నట్లు పోలీసులకు పక్కా సమాచారం అందింది. ఆదివారం (మార్చి 15, 2026) మధ్యాహ్నం 2 గంటల ప్రాంతంలో డీఎస్పీ శివరాం రెడ్డి నేతృత్వంలో వన్ టౌన్ పోలీసులు ఆకస్మిక తనిఖీలు చేపట్టారు. ఈ దాడిలో గంజాయి తాగుతూ, విక్రయిస్తున్న నలుగురు నిందితులను రెడ్ హ్యాండెడ్గా పట్టుకున్నారు.
హైదరాబాద్ టూ నల్లగొండ.. విద్యార్థులే లక్ష్యం
పోలీసుల విచారణలో దిగ్భ్రాంతికర విషయాలు వెలుగులోకి వచ్చాయి. నిందితులు హైదరాబాద్లోని ధూల్పేట్ ప్రాంతం నుండి గంజాయిని అక్రమంగా తీసుకువచ్చి, నల్లగొండలోని విద్యార్థులు, యువతకు చిన్న చిన్న ప్యాకెట్ల రూపంలో విక్రయిస్తున్నట్లు తేలింది.
- అరెస్ట్ అయిన వారు: మహమ్మద్ ఫూర్ఖాన్ (19), కారింగుల ప్రదీప్ (22), వల్కీ వినోద్ కుమార్ (26), బైరుగోండ నవీన్ (24).
- స్వాధీనం చేసుకున్నవి: 2 కిలోల గంజాయి (విలువ సుమారు రూ. 50 వేలు), రెండు మోటార్ సైకిళ్లు, నాలుగు స్మార్ట్ ఫోన్లు.
నిందితులపై ఎన్డీపీఎస్ (NDPS) యాక్ట్ కింద కేసు నమోదు చేసి రిమాండ్కు తరలించినట్లు పోలీసులు తెలిపారు.
డీఎస్పీ హెచ్చరిక: పీడీ యాక్ట్ తప్పదు!
ఈ సందర్భంగా డీఎస్పీ శివరాం రెడ్డి మాట్లాడుతూ, జిల్లాలో గంజాయి రవాణా చేసినా, విక్రయించినా కఠిన చర్యలు తీసుకుంటామని హెచ్చరించారు. అవసరమైతే నిందితులపై పీడీ యాక్ట్ (PD Act) ప్రయోగిస్తామన్నారు. ముఖ్యంగా విద్యాసంస్థలు, హాస్టళ్లు, నిర్మానుష ప్రాంతాలపై ప్రత్యేక నిఘా ఉంచామని, తల్లిదండ్రులు తమ పిల్లల నడవడికపై దృష్టి సారించాలని కోరారు.
చిగురుటాకులు గిల్లేస్తున్న గంజాయి రక్కసి
నల్లగొండలో పట్టుబడిన నిందితుల వయస్సు గమనిస్తే (19 నుంచి 26 ఏళ్లు), యువత ఎంతలా ఈ వ్యసనానికి బానిసవుతున్నారో అర్థమవుతోంది. కేవలం అమ్మేవారిని పట్టుకోవడమే కాకుండా, వీరికి గంజాయి అలవాటు చేస్తున్న ‘సప్లై చైన్’ను పూర్తిగా తుడిచిపెట్టాలి. ధూల్పేట్ నుంచి నల్లగొండ దాకా పోలీసుల కళ్లు గప్పి గంజాయి వస్తోందంటే, చెక్ పోస్టుల వద్ద నిఘా మరింత పెరగాల్సిన అవసరం ఉంది. సమాజం కూడా పోలీసులకు సహకరిస్తేనే ఈ ‘విష సంస్కృతి’ని అంతం చేయగలం.
