నల్లగొండ, ఏపీబీ న్యూస్: మున్సిపల్ ఎన్నికల ఫలితాలతో నల్లగొండ జిల్లా మరోసారి కాంగ్రెస్ కంచుకోట అని నిరూపితమైందని రాష్ట్ర మంత్రి కోమటిరెడ్డి వెంకట్ రెడ్డి అన్నారు. నల్లగొండ మున్సిపల్ కార్పొరేషన్తో పాటు ఉమ్మడి జిల్లా వ్యాప్తంగా కాంగ్రెస్ జెండా ఎగురవేయడం పట్ల ఆయన హర్షం వ్యక్తం చేశారు. గెలుపొందిన అభ్యర్థులను అభినందించేందుకు నల్లగొండ చేరుకున్న ఆయన, స్థానిక క్లాక్ టవర్ సెంటర్లో ఏర్పాటు చేసిన మీడియా సమావేశంలో కీలక వ్యాఖ్యలు చేశారు.
హైదరాబాద్కు దీటుగా అభివృద్ధి: నల్లగొండ మున్సిపల్ కార్పొరేషన్ను హైదరాబాద్ నగరానికి దీటుగా అభివృద్ధి చేస్తానని మంత్రి హామీ ఇచ్చారు. మేయర్, డిప్యూటీ మేయర్ ఎన్నికల అనంతరం అభివృద్ధి పనులకు అధికారికంగా శ్రీకారం చుడతామని వెల్లడించారు.
వారానికి రెండు రోజులు నల్లగొండలోనే: ప్రజల సమస్యలను నేరుగా తెలుసుకునేందుకు వారానికి రెండు రోజులు నల్లగొండలోనే అందుబాటులో ఉంటానని, ప్రతి డివిజన్లో ‘ప్రజా దర్బార్’ నిర్వహిస్తానని ప్రకటించారు.
బీఆర్ఎస్కు హితవు: ఓటమిని అంగీకరించి ఆత్మవిమర్శ చేసుకోవాలని బీఆర్ఎస్ నాయకులకు సూచించారు. రాజకీయాలకు అతీతంగా ప్రజల సమస్యల పరిష్కారమే ఎజెండాగా కాంగ్రెస్ పాలన సాగుతుందన్నారు.
హామీల అమలు: ప్రజలు ఉంచిన నమ్మకాన్ని నిలబెట్టుకుంటామని, ఎన్నికల సమయంలో ఇచ్చిన ప్రతి హామీని ముఖ్యమంత్రి రేవంత్ రెడ్డి నాయకత్వంలో నెరవేరుస్తామని స్పష్టం చేశారు.
అభ్యర్థులకు దిశానిర్దేశం:
ఎన్నికల్లో గెలుపోటములు సహజమని, ఓడిపోయిన వారు నిరాశ చెందకుండా డివిజన్ సమస్యలను తన దృష్టికి తీసుకురావాలని మంత్రి కోరారు. గెలిచిన కార్పొరేటర్లు అంకితభావంతో పనిచేసి నల్లగొండను అభివృద్ధి పథంలో నడిపించాలని పిలుపునిచ్చారు. ఈ కార్యక్రమంలో పట్టణ కాంగ్రెస్ అధ్యక్షుడు గుమ్ముల మోహన్ రెడ్డి, మాజీ మున్సిపల్ చైర్మన్ బుర్రి శ్రీనివాస్ రెడ్డి, ఇతర ముఖ్య నేతలు పాల్గొన్నారు.
